Fil-Floriana, quddiem baħar ta’ nies li ħonoq il-Fosos, il-Prim Minsitru u mexxej Laburista Joseph Muscat qal li nhar is-Sibt li ġej, il-poplu jrid jiddeċiedi dwar it-tip ta’ futur li rridu għal uliedna.
Sar ħafna f’ dawn l-erba’ snin, għaliex il-familji u negozji Maltin u Għawdxin emmnu fil-bidla, minkejja li l-forzi konservattivi kienu ppruvaw jaqtgħu l-qlub.
Qalu li se jkun hawn il-qgħad, li se nfallu u jkollna bżonn bailout, li l-kontijiet qatt ma jistgħu jorħsu, li bilfors kellna nibqgħu nużaw żejt li jniġġeż, li l-problemi fil-qasam tas-saħħa kellna nidrawhom u li pajjiżna mhux lest għal drittijiet ċivili.
Ħasbu, spjega Muscat, li t-tattika tal-biża se taħdem. Ħasbu li l-Maltin u Għawdxin se jbaxxu rashom, jaqtgħu qalbhom, u jkomplu jikkuntentaw ruħhom bil-medjokrità li kienu draw biha. Iżda ma ġarax hekk. Il-familji u negozji Maltin u Għawdxin ma bezgħux. Għazlu li jibdlu id-direzzjoni. Għazlu lil dan il-Moviment li permezz tiegħu twettqu wħud mill-akbar bidliet fl-istorja ta’ pajjiżna, fl-iqsar żmien imaginabbli.
Fejn qalulna li se jkun hawn il-qgħad, qal Joseph Muscat, inħoloq l-aktar numru ta’ postijiet tax-xogħol fl-istorja. Fejn qalu li se nittallbu għal bailout, inkiseb l-ewwel surplus f’ ġenerazzjoni. Fejn qalu li l-kontijiet ma jistgħux jorhsu, illum kull familja u negozju qed jirċievu kontijiet orħos, €80 miljun fis-sena aktar fil-bwiet tal-familji u negozji Maltin u Għawdxin. Fejn qalu li kellna nibqgħu nużaw iż-żejt maħmuġ, f’ kull sens, illum pajjiżna għandu l-aqwa teknologija għas-saħħa tal-ulied u tal-ambjent.
Fejn qalu li huwa normali li jkun hemm mediċini out of stock, illum min għandu bżonn isib il-mediċini li għandu bżonn. Fejn qalu li l-poplu mhux lest għal libertajiet ċivili ġodda u ppruvaw ifixklu billi astjenew, il-Partit Laburista emmen fin-nies, u sirna soċjetà li pajjiżi oħra jammiraw għall-ugwaljanza u tolleranza.
“Minn konservattivi sirna progressivi, minn tmexxija medjokri għandna tmexxija dinamika, minn pajjiż li jsegwi, sirna l-Aqwa fl-Ewropa”.
Iżda, spjega Muscat, għad fadal ħafna aktar suċċessi li nistgħu niksbu flimkien. Erba’ snin ilu kien hemm min qal li qed Joseph Muscat qed joħlom meta qal li pajjizna jista’ jagħmel tant suċċess. Kienu jgħidu li aħna ambizzjuzi żżejjed, iżda llum qed jissorprendu ruħhom. Ikun hemm min jaħseb li dan kien ċiklu li ma jistax jiġi ripetut, li kienet fażi ta’ darba ta’ suċċessi u bidliet li ma jistgħux jerġgħu iseħħu.
“Għandi ahbar għal kull min jaħseb hekk. L-impossibbli huwa l-isfida li tmexxi l-ambizzjoni tagħna. Kull darba li xi ħadd jgħidilna li imposibbli noħolqu aktar xogħol, li impossibbli li nnaqqsu aktar it-taxxi, li impossibbli li nġibu aktar investiment, dan jimliena bl-enerġija u l-ottimiżmu biex dak li għal ħaddiehor hu impossibbli, għalina, bis-saħħa tagħkom, isir possibbli” qal Muscat quddiem folla li nfexxet f’ċapċip.
Ħaddieħor, l-istess nies li ppruvaw jaqtawlna qalbna erba’ snin ilu, li ppruvaw ifixklu u li jogħxew jikonfoffaw kontra Malta, iridu jerġgħu jippruvaw ibezzgħu. Ibezzgħu bil-postijiet tax-xogħol. Ibezzgħu għax m’ għandhomx x’joffru. Iżda l-istess se jerġa’ jigri għaliex mhux biss se jibqgħu hawn Malta l-kumpaniji, izda se jiżdiedu. Se jiżdied ix-xogħol, se jiżdied l-investiment, se jiżdiedu l-opportunitajiet.
Il-prinċipji li jmexxuna huma l-mobiltà soċjali, li wieħed jimxi ‘il quddiem u li naraw li uliedna jkunu aħjar minna. Il-ġustizzja soċjali, li ngħinu lil min għandu bżonn biex iqum fuq saqajh. L-ugwaljanza, fejn kulħadd ikollu l-istess opportunitajiet għas-suċċess. L-għaqda, fejn infittxu dak li jgħaqqadna mhux jifridna, u li nkunu kburin f’ pajjiżna, dejjem u kullimkien.
Permezz tal-pjan konkret, realistiku u costed, partit Laburista fil-Gvern se jkun qed jara li l-ġid jasal għand dejjem aktar familji u negozji, permezz tal-attitudni pro business, li toħloq saħansitra aktar xogħol u ssaħħaħ il-Middle Class il-ġdida li bdejna nibnu flimkien.
Għalhekk, qal il-Mexxej Laburista, hemm bżonn li fit-tlieta ta’ Ġunju l-poplu jivvota għall-Partit Laburista, għal dan il-Moviment.
Vot li permezz tiegħu se tingħata aktar għajnuna biex nies joħorġu mill-kera u jsiru sidien ta’ darhom permezz ta’ dik il-ftit għajnuna aktar li jkollhom bzonn.
Vot li permezz tiegħu tkompli tingħata għajnuna lil min qed jixtri l-ewwel propjeta’ tiegħu, iżda issa ukoll lil min wasal biex ibiddel daru biex jiehu hsieb il-bżonnijiet ta’ familtu.
Vot li permezz tiegħu tassigura li l-ekonomija tibqa tikber għax ma tkunx immexxija minn dilettanti li m’ għandhomx idea kif jahdem l-investiment, iżda minn ekonomisti kompetenti, li kienu kapaċi jkabbru l-ekonomija, iżidu l-postijiet tax-xogħol fl-ogħla livell fl-istorja, iżidu l-flus fl-idejn, inaqqsu t-taxxi u jnaqqsu l-kontijiet.
Kif kienu salvati kumpaniji bħall- Enemalta, tkun salvata l-Airmalta bi pjan ċar u li jitwettaq.
Hawn il-Prim Ministru semma lista twila ta’ miżuri costed li qed jipproponi Partit Laburista jekk ikun fil-Gvern. Min-naha l-oħra, jekk dak li jkun ma jmurx jivvota jew jivvota għal xi partit ieħor ikun ifisser li titkisser il-kredibilta’ ekonomika li nbniet, għaliex is-sommom ta’ ħaddiehor ma jagħmlux sens, u jkunu jfissru li l-familji u negozji jkollhom iħallsu taxxi ogħla.
Ikun ifisser li mhux veru jkun hemm protezzjoni ambjentali għaliex jerggħu jibdew jirrennjaw l-istess persuni li kissru dan l-ambjent. Ma jkollniex l-isptarijiet ġodda, it-toroq ġodda, l-infrastruttura ġdida.
L-istess persuni li qatt ma refgħu subgħa biex jgħinu lil dawk l-aktar fil-bżonn, u li opponew kull riforma li għenet toħloq il-ġid li kulhadd qed igawdi minnu.
Ikun ifisser li Simon Busuttil ikollu l-bieb miftuħ biex ipattiha lil kull waħda u wieħed minnkom.
Ikun ifisser li jkun hemm Simon Busuttil bħala Prim Ministru li mhux kapaċi jmexxi l-ekonomija, li jmexxi Gvern dgħajjef b’ siggu wieħed maġġoranza, ostaġġ ta’ Marlene Farrugia, li huma garanzija ta’ instabilità. Ikun ifisser li minflok surplus u gid ikollna defiicit, dejn, downgrades u indeċiżjoni.
Ikun ifisser li l-vittmi ta’ Simon Busuttil u Marlene Farrugia ma jkunux biss l-istatistiċi, iżda fuq kollox il-post tax-xogħol, id-dħul tal-familja, is-serħan tal-moħħ għall-ulied. Tkun ippremjata politika ta’ firda u biża. Joseph Muscat qal li l-argumenti ta’ Simon Busuttil huma mibnija fuq l-ipokrezija u double standards. Ikkritika lil min ikollu kumpanija barra, iżda ma jara xejn ħazin li l-viċi kap tiegħu għandu kumpanija Cipru, wara li nhar il-Gimgħa kien qal li mhux minnu. Inqabad jigdeb.
Ilu jgħid li min jiġi investigat għandu jitkeċċa, iżda ma jridx ikeċċi lil Beppe Fenech Adami. Beppe Fenech Adami qed jiġi investigat li kien involut ma’ kumpanija imdaħħla fil-ħasil ta’ flus minn droga. “Kun konsistenti. Keccih jekk trid li tkun kredibbli” qal Muscat.
Imbagħad Simon Busuttil, li tant jippriedka t-trasparenza irranga kif kelku ftit poter biex klijent tiegħu jieħdu €5miljun mingħajr ma jistenna sentenza tal-qorti.
“Kemm il-mitt elf ħa commission minn dawn il-ħames miljun Simon Busuttil?” staqsa Joseph Muscat.
Hawn indirizza b’ mod partikolari lil dawk li vvutaw lil dan il-Moviment għall-ewwel darba erba’ snin ilu. Lil dawn qalilhom: “int fdajtni u llum taf li bid-difetti kollha tiegħi, qed inroddlok lura l-pajjiż li tixtieq int. Ma nistgħux nerggħu lura. Ma nistgħux nitilfu dak li ksibna flimkien. Ma nistgħux nieqfu nofs triq. Erġa afdani. Erggħu afdawna. Għandi l-istess entużjazmu, l-istess enerġija, l-istess posittività, u issa għandi ukoll l-esperjenza”.
Il-Mexxej tal-Partit Laburista fakkar li l-istorja tal-poplu Malti, sa minn dejjem kienet ikkaratterizzata mir-rieda li jimxi l-quddiem u jtejjeb il-kundizzjoni tiegħu, flimkien mal-bżulija biex jasal f’post aħjar milli qiegħed fih. Il-Maltin dejjem kellom ħolm li jaslu fejn oħrajn lanqas qatt immaġinaw.
Il-Maltin ħames snin ilu vvotaw għal bidla tanġibbli u mhux wahda kosmetika. Emmnu li seta jwettaq dak li ħafna kienu ddeskrivew bħala utopia. Dawk il-proposti għamlu pjan li kellu jeleva dan il-pajjiz minn stat mifni mill-aħmar u l-blu għal wieħed ta’ unita bil-għan li nilqu l-eċċellenza għal-Maltin u l-Għawdxin kolla.
Joseph Muscat għaraf li ħafna forsi jsaqsu: fejn aktar jista jasal dan il-Gvern? X’jista jagħmel aktar minn dak li diġa għamel? Dawn qal li huma mistoqsijiet li jagħmlu sens. Iżda, żied jgħid Muscat, xinu l-bniedem mingħir il-ħolm tiegħu? X’sens ikolla l-ħajja mingħir aspirazzjoni li dejjem tkun aħjar u tilħaq livelli ġodda f’ħajtek?
Dan huwa propju l-bażi ta’ dak li qegħdin jingħata lil pajjiżna.
“Aħna pajjiż magħqud li ħadd m’hu se jifridna” qal Muscat. Qal li l-Partit Laburista ma jmurx jitkellem kontra Malta barra minn pajjiżna.
“Jien inwegħdkom li se nkompli naħdem biex ngħaqqad lil dan il-poplu, biex ngħollu lil pajjizna ‘il fuq, li għajnejna jleqqu x’ hin naraw il-bajda u hamra tagħna tperper mall-irjiehat, l-Aqwa fl-Ewropa, li se nagħmluha l-għira tad-dinja” temm jgħid Joseph Muscat.
Quddiem baħar aħmar ta’ bnadar Maltin, qal li l-aqwa żmien ta’ pajjiżna għadu gej.
