Sa issa naqsu bi tminn mija l-kumpaniji li minħabba l-pandemija ġabu permess biex inaqqsu l-kundizzjonijiet tax-xogħol tal-ħaddiema.
Il-Ministru fl-uffiċċju tal-Prim Minsitru Carmelo Abela ta rendikont tax-xogħol tad-dipartiment tar-relazzjonijiet industrijali fuq il-post tax-xogħol tul din is-sena. Huwa stqarr li din kienet sena li bħala pajjiż ridna nuru kuraġġ.
Stqarr kif matul din is-sena, qatt daqs dan iż-żmien ma kien użat l-artiklu fil-liġi li jagħti l-poter lid-dipartiment biex jagħti l-permess biex il-kundizzjonijiet tax-xogħol jinbidlu għal żmien temporanju biex il-ħaddiema ma jitilfux il-post tax-xogħol tagħhom.
Minn Marzu, madwar 1,000 kumpanija li ngħataw il-permess u illum madwar 200 kumpanija għad għandhom dan il-permess li jkun imġedded kull erba’ ġimgħat. Dan il-mekkaniżmu salva l-post tax-xogħol għal aktar minn 25,000 ħaddiem.
Id-Direttur Ġenerali tad-Dipartiment tar-relazzjonijiet industrijali fuq il-post tax-xogħol, Diane Vella Muscat spjegat kif sal-aħħar ta’ din is-sena rajna tnaqqis drastiku fil-kumpaniji li bdew jagħmlu użu minn dan it-tip ta’ permess hekk kif bil-mod il-mod, il-kumpaniji bdew jerġgħu isibu saqajhom.
Hija spjegat: “B’kollox kellna madwar elf permess li ngħataw. Dawn qisu sa Ġunju, Lulju kienu għadhom hemmhekk, imbagħad qisu lejn l-aħħar tas-sajf bdew jonqsu ftit ftit. Għalfejn? Bdejna naraw eżempju ħwienet reġgħu fetħu, ħafna anke ħwienet maltin qed joffru s-servizzi tagħhom, online delivery, u allura reġgħu qed joperaw, ristoranti li reġgħu fetħu u allura again l-operat tagħhom reġa’ ttejjeb.”
Il-Ministru Abela spjega kif id-Dipartiment għar-Relazzjonijiet Industrijali jwettaq investigazzjonijiet, laqgħat konċiljatorji u servizz ta’ appoġġ għall-impjegati u min iħaddem. Stqarr kif f’din is-sena ġew imnedija żewġ freephones, 175 għall-impjegati u 176 għal min iħaddem. Dan sabiex f’dan iż-żmien tal-pandemija l-ħaddiema u min iħaddem ikun jista’ jsib l-għajnuna tad-dipartiment.
Stqarr kif id-dipartiment irċieva 43,459 telefonata. 6,632 minn dawn kienu telefonati minn min iħaddem. Spjega kif il-freephone ser ikun qed jinżamm anke wara l-pandemija.
Il-Ministru Abela qal kif kien hemm ukoll kważi ħmistax-il elf email li kollha ġew imwieġba.
Mill-bidu tas-sena sa Marzu marru fiżikament għand id-dipartiment 686 persuna. Iżda mbagħad id-dipartiment ingħalaq u għalhekk kien hemm żieda fl-emails u t-telefonati. Id-dipartiment mistenni jerġa’ jiftaħ għall-pubbliku għal nofs Jannar. Stqarr li d-dipartiment dam iktar ma jinfetaħ minħabba li saru xi xogħlijiet fih hekk kif ingħalaq.
Il-Ministru Carmelo Abela stqarr kif bil-ħidma ta’ dan id-dipartiment ġew salvati eluf ta’ impjiegi.
Huwa qal: “Il-ħidma kollettiva tal-Gvern kienet kruċjali biex salvajna eluf ta’ impjiegi u mhux biss il-ħamsa u għoxrin elf li kien bl-intervent tad-dipartiment ukoll li dawn ġew salvati iżda għad- dirittura ħafna aktar eluf ta’ ħaddiema li żammew l-impjieg tagħhom.”
Huwa innota wkoll kif saru numru ta’ investigazzjonijiet għall-prattiċi illegali minn min iħaddem bħal nuqqas ta’ ħlas ta’ pagi u bonuses, jew li min iħaddem ma jagħtix pay slip.
882 każ ġew investigati tul din is-sena. Innota kif dan juri li l-ħaddiema tad-dipartiment komplew għaddejjin bix-xogħol tagħhom anke fi żmien il-pandemija.
Dwar ir-relazzjonijiet industrijali id-dipartiment sejjaħ 65 laqgħa konċiljatorja li minnhom 88% minnhom il-każijiet ġew riżolti wara diskussjoni madwar il-mejda u li għalhekk ma nħolqux tilwim industrijali minnhom.
Dwar it-tribunal industrijali qal li mill-bidu tas-sena tressqu 110 każijiet ġodda li 89 minnhom kienu fuq allegat tkeċċija inġusta. Dan filwaqt li 9 każijiet allegaw li kien hemm ukoll diskriminazzjoni magħhom. It-tribunal iddeċieda wkoll 49 każ li 42 każ minnhom ikkonċernaw każijiet dwar tkeċċija inġusta. Dan filwaqt li kien hemm ukoll 2 każijiet dwar tilwim industrijali.
Stqarr li għas-sena d-dieħla, fl-ewwel xhur ser tibqa prijorità li jkomplu jkunu salvati l-impjiegi.
