“Għal Feliċ, l-importanti hi l-għaqda tal-familja. Jogħxa fejn ikun hemm l-għaqda fil-familja u fuq ix-xogħol.”
Kien b’dan il-mod skjett li fis-Santwarju tal-Madonna tal-Grazzja f’Ħaż-Żabbar, l-Arċipriet Dun Evan Caruana ddeskriva l-aktar ħaġa importanti għal Felix Agius, magħruf ma’ kull min kien jafu bħala Feliċ.
Il-ġurnalist u editur veteran, miet il-Ħamis li għadda fl-età ta’ tlieta u sebgħin sena.
Fil-preżenza ta’ martu Vena, l-erba’ uliedhom, u s-seba’ neputijiet li kienu lebsin flokkijiet ħomor tat-tim tal-futbol Ġermaniż li tant kien iħobb, Feliċ kien deskritt bħala raġel ta’ prinċipju b’valuri sodi msejsa fuq pedamenti b’saħħithom.
L-għaqda u l-familja, kienu kollox għalih.
Dun Evan irrakkonta, “uliedu qaluli li kien jieħdu gost meta jċemplulu flimkien anki meta kien l-isptar. Kien jieħu gost li jċemplulu wieħed wieħed, jew waħda waħda, imma li jkunu flimkien u jarahom magħqudin, kienet l-għaxqa tiegħu.”
B’aktar minn ħames deċenji esperjenza fil-ġurnaliżmu, Feliċ kien imfittex ħafna għall-pariri.
Dun Evan kompla jgħid, “bniedem li għadda dan iż-żmien kollu b’ħamsin sena f’dil-karriera, żgur li kellu minjiera ta’ esperjenza u s-sabiħ hu li aħna ma nżommuhiex għalina din il-ħaġa imma ngħadduha lill-oħrajn.”
Dun Evan qal li Feliċ kien jgħix il-missjoni tan-Nisrani, għaliex kien kapaċi jisma’ b’umiltà.
Dun Evan stqarr, “l-għarfien tiegħu kien jaqsmu mal-oħrajn, isaħħaħ ir-relazzjonijiet u allura jidħol ukoll fil-ħajja ta’ dak li jkun biex dejjem jgħin fejn hemm it-tbatija b’mod speċjali.”
Xi ħaġa li spikkat tul l-aħħar mumenti ta’ Feliċ fuq din l-art kienet li hu għamel kuraġġ lil kull min mar iżuru, minflok huma għamlu l-kuraġġ lilu.
Bil-vuċi majestuża ta’ Mary Spiteri, Feliċ ingħata l-aħħar tislima u nħareġ mis-Santwarju fl-isfond ta’ ċapċip kbir.
Il-kantanta qalet, “li kantajtlu fil-quddiesa, fil-funeral, huwa unur kbir, iva qsim il-qalb għax jiena lil Feliċ ili nafu s-snin minjaf kemm kitibli affarijiet sbieħ fuq il-gazzetta u tħoss ħafna imma dejjem nafu raġel serju, raġel tal-affari tiegħu, onest, bniedem umli, j’Alla tismagħna mis-sema issa.”
