Nies li huma favur l-ideoloġija ta’ Donald Trump “Make America Great Again” huma ta’ theddida għad-demokrazija li biha timxi l-Istati Uniti. Dan qalu l-President Amerikan Joe Biden f’diskors li għamel f’Pennsylvania, il-Ħamis filgħaxija.
Fid-diskors tiegħu Biden beda jitkellem fuq it-tema tal-kampanja tiegħu tal-2020 li jrid jirrestawra r-ruħ tal-Amerikani.
Huwa qal li mhux jikkundanna lill-erbgħa u sebgħin miljun Amerikan li vvutaw lil Donald Trump sentejn ilu imma imbagħad kompla jgħid kif ir-Repubblikani Maga huma ta’ theddida.
Wara d-diskors tiegħu, Kevin McCarthy li huwa mexxej tal-minoranza Repubblikana fil-Kamra tar-Rappreżentanti tal-Istati Uniti, tkellem u b’dispjaċir qal li Biden weġġa’ lil ħafna Amerikani b’diskors dispreġġjativ bħal dak.
Donald Trump ukoll wieġeb għal dak li qal il-President Biden, u qal li jekk Biden ma jaħsibx li hemm bżonn li jkun hemm l-idea ta’ “Make America Great Again” huwa mhuwiex mentalment stabbli jew qed ibati mid-dimensja.
