Is-sit tal-aħbarijiet awtorevoli Politico żvela kunflitt ta’ interess qawwi ta’ Roberta Metsola bħala President tal-Parlament Ewropew u żewġha Ukko Metsola, Finlandiż li huwa lobbyist kbir fl-industrija tal-cruiseliner permezz tal-interessi tiegħu ma’ Royal Caribbean Group.
Dak żvelat idur mal-irwol tar-raġel ta’ Metsola li jinfluwenza liġi ambjentali li tolqot l-ispejjeż tal-kumpanija tal-cruiseliners li jmexxi u jirrappreżenta u l-fatt li din il-liġi ambjentali spiċċat iffirmata minn Roberta Metsola.
Żewġha talab laxkezzi f’liġijiet ambjentali
Fil-fatt sa ftit tax-xhur ilu, huwa talab laxkezzi fil-liġijiet ambjentali li jolqtu l-kumpanija tiegħu.
Bit-titlu ‘The Metsola exception: The European Parliament president and her lobbyist husband’, l-artiklu tal-Politico jiżvela kif regoli u obbligi li daħlet Metsola fuq kull Membru tal-Parlament Ewropew li jiddikjaraw kunflitti ta’ interess li għandhom anki permezz tal-irġiel u n-nisa tagħhom, għal Metsola dawn ma japplikawx.
Politico nnutat kif Metsola għamlet dawn l-obbligi f’ġieħ suppost it-trasparenza li tant tiftaħar biha iżda dawn il-kodiċi jgħidu li kulħadd irid jiddikjara l-kunflitt ta’ interess barra hi.
Politico jispjega kif żewġha għandu interessi kbar għall-kumpanija kbira tal-cruiseliners u li għandha involviment fit-tniġġis tal-portijiet permezz tal-vapuri.
Fil-fatt żewġha spiċċa anki Viċi-President ta’ Royal Caribbean Group ibbażata f’Miami u kien anki d-Direttur Ġenerali tal-Assoċjazzjoni Internazzjonali tal-Cruiseliners.
Ir-regoli japplikaw għal kulħadd barra fuqha
Politico jinnota kif Metsola titkellem ħafna fuq il-governanza u wara l-iskandlu tal-Qatargate li wkoll kien jinvolvi influwenzi u kunflitti ta’ interess, rat li tirregola lil kulħadd barra lilha nnifisha.
Politico jiżvela kontenut ta’ emails li fihom ir-raġel ta’ Metsola jitlob anki għal laqgħat ta’ Royal Caribbean Group mal-Unjoni Ewropea.
Jirriżulta li mill-Unjoni Ewropea weġbuh f’inqas minn tliet kwarti u ngħata appuntament għal ġimgħa wara, b’rappreżentant ta’ għaqda ambjentali jgħid li dan hu stramb meta fil-fatt huma jitolbu għal appuntament, dan idum biex jasal.
Ir-raġel ta’ Metsola qal li martu qatt ma tkellmet fuq is-settur li hu jinfluwenza fejn fost l-oħrajn talab għal finanzjament mill-Unjoni Ewropea biex il-kumpanija tal-cruiseliners tagħmel il-qalba ambjentali.
Iżda Politico żvelat kif dan mhuwiex minnu u nstabu sa issa minn tal-inqas żewġ okkażjonijiet li Metsola tkellmet fuq is-settur, b’kelliem għall-President tal-Parlament Ewropew jagħti l-impressjoni li dawn kienu dikjarazzjonijiet ġenerali.
Metsola tammetti d-double standards
Il-kelliem għal Metsola ammetta li r-regoli li kulħadd kellu joqgħod għalihom u jiddikjara kunflitt ta’ interess saru b’tali mod li ma japplikawx għall-President tal-Parlament Ewropew biex fi kliem Politico, Metsola ma tidhirx li kisret regoli favur it-trasparenza iżda ma mexxietx bl-eżempju.
Membri Parlamentari Ewropej li tkellmu ma’ Politico nnutaw kif qatt ma ntebħu b’din il-loop hole u ma kinux konxji b’din il-ħadma li tħalli barra lil Metsola.
Dan filwaqt li Metsola permezz tal-kelliem tagħha qalet li r-regoli li daħlet japplikaw għal karigi u persuni b’portafolli speċifiċi fil-Parlament Ewropew u hi tirrappreżenta lill-Parlament sħiħ.
Politico wkoll semma kif dan l-iskandlu żvelat ġej wara li fl-aħħar jiem ħatret lir-raġel t’oħtha, Matthew Tabone, bħala Kap tal-Kabinett tagħha.
Ġie nnutat kif qabel l-elezzjoni tal-Parlament Ewropew ta’ Ġunju li għadda Metsola rtirat ħatra ta’ Tabone għax inkixfet minn ġurnal Taljan iżda wara li telgħet fl-elezzjoni, tat lil Tabone paga ta’ €20,000 fix-xahar.
