L-uffiċjali tal-Pulizija li sabu l-ġisem bla ħajja ta’ Mario Farrugia, li nstab mejjet fil-bagoll ta’ karozza fil-wied ta’ Ħal Qormi f’April li għadda, taw ix-xhieda tagħhom fil-Qorti dwar is-sejba makabra.
Tliet uffiċjali xehdu quddiem il-Maġistrat Astrid May Grima, hekk kif kompliet il-kumpilazzjoni tal-evidenza kontra Elliott Paul Busuttil, li qed ikun akkużat bil-qtil ta’ Farrugia, fost akkużi oħra.
Surġent tal-Pulizija stazzjonat f’San Ġiljan, xehed kif fl-għaxra neqsin kwart ta’ filgħodu tal-ħamsa ta’ April, kien xogħol ma’ żewġ uffiċjali oħra u kien qed isuq lejn il-kwartieri tal-Pulizija. Spjega kif dak il-ħin, irċieva telefonata mingħand Spettur li qallu biex jitlaq kollox minn idejh u jsuq lejn il-wied ta’ Ħal Qormi.
Is-Surġent saq sal-wied, fejn it-tliet uffiċjali raw vann ipparkjat ħdejn karozza Peugeot 407, li kienet taqbel mad-deskrizzjoni tal-karozza tar-raġel li kien ġie rrappurtat nieqes.
Spjega kif il-karozza kienet maħmuġa bix-xita tal-ħamrija u kienet iebsa biex jaraw x’kien hemm ġol-karozza għaliex it-twieqi kienu mgħottija kollha bil-ħamrija.
Il-Pulizija raw li ma kien hemm xejn fin-naħa tal-passiġġieri tal-karozza iżda fid-daqqa u l-ħin għaddiet buffura riħ li ġabet magħha riħa qawwija ta’ kompożizzjoni mill-bagoll, li kien qed jattira wkoll id-dubbien.
Dak il-ħin, ġie nnutat likwidu skur fuq it-tarmak taħt il-bieba tax-xellug ta’ quddiem.
Biex jiddetermina l-kulur tal-likwidu, is-Surġent qatta’ biċċa karta mid-djarju tiegħu u mess il-likwidu biha. “Il-karta mill-ewwel ġiet ħamra”, xehed is-Surġent.
Huwa nforma lill-Ispettur b’dak li sab u għalaq it-triq biex ix-xena tar-reat tkun ippriservata.
Hemmhekk inħatret mill-ewwel inkjesta Maġisterjali.
Il-ġisem bla ħajja ta’ Farrugia nstab fil-bagoll tal-karozza, u aktar tard fl-investigazzjonijiet irriżulta li r-raġel miet b’45 daqqa ta’ sikkina f’sidru.
Traċċi tad-demm tiegħu nstabu fil-kamra tas-sodda tal-akkużat.
Il-każ ikompli fil-11 ta’ Lulju.
