Ittella’ s-saqaf fuq faċilità li nbniet b’investiment ta’ €40 miljun f’wieħed mill-akbar proġetti li qatt ra pajjiżna fis-settur tal-avjazzjoni.
Ix-xogħol fuq din il-faċilità state of the art fil-mitjar Malti, beda f’Lulju tas-sena l-oħra, u kellu jieqaf ħesrem għal ftit minħabba sejbiet arkeoloġiċi.
Sena wara, issaqqaf il-hangar biex issa jonqos biss l-aħħar ftit irtokki biex erba’ xhur oħra, il-faċilità tibda tilqa’ l-ajruplani.
Il-Ministru għall-Ekonomija Silvio Schembri qal li dan l-investiment robust se jara l-ħolqien ta’ mijiet ta’ impjiegi ġodda.
Il-Ministru Schembri stqarr: “Dan huwa investiment li ħa jkun qed irendi madwar mitejn u ħamsin, tliet mija u ħamsin impjieg ieħor ta’ kwalità tajba u dan huwa l-mod kif qed naħdmu bħala Gvern, inkomplu niddiversifikaw u naraw li nikkreaw opportunitajiet ġodda għal kulħadd.”
Mifruxa fuq għoxrin elf metru kwadru b’elf u mitejn tomna tal-ħadid, il-faċilità tal-kumpanija SR Technics tiflaħ sa sitt ajruplani f’daqqa li jkollhom bżonn tiswija jew manutenzjoni.
Il-General Manager tal-kumpanija, Arthur Magri, spjega x-xogħol li se jkun qed isir fil-hangar ġaladarba jkun lest ftit tax-xhur oħra.
Is-Sur Magri spjega: “Ix-xogħol li ħa jsir huwa varju. Ħa jsiru cabin modifications, 12-year checks, 6-year checks, dak kollu li jkollu bżonn l-airline industry.”
Huwa kompla jispjega l-proċess li jsir qabel ajruplan jinġieb Malta għall-manutenzjoni: “L-airline tibda tippjana prattikament minn sena qabel jew ammont ta’ snin qabel skont il-maintenance plan tagħha. Isiru commercial negotiations bħal dejjem imbagħad xahar qabel jasal l-ajruplan Malta, nirċievu l-pakket fejn jibda jinħadem, naraw x’materjal għandna bżonn, x’nies għandek bżonn, jekk għandekx bżonn xi special skills ħalli dakinhar li jasal l-ajruplan ikollok kollox preparat.”
Il-Ministru għall-Ekonomija spjega li dan l-investiment jikkumplimenta l-istrateġija tal-Malta Industrial Parks u l-Malta Enterprise biex is-settur tal-avjazzjoni jkompli jissaħħaħ.
Fl-istess waqt jikkumplimenta wkoll il-viżjoni tal-Gvern biex jiġu attirati investimenti ġodda fis-settur.
F’dan ir-rigward, il-Ministru Schembri ħabbar li f’pass innovattiv, fl-aħħar jiem saret bidla fil-liġi li tirrigwardja r-reġistrazzjoni tal-kumpaniji.
Il-Ministru Schembri sostna: “Bħala pajjiż, qegħdin pajjiż fid-direzzjoni t-tajba, qegħdin nattiraw ħafna kumpaniji li jirreġistraw l-ajruplani tagħhom però issa ħloqna framework ġdid, dak li jgħidulu tas-cell companies, li permezz tiegħu ħa jagħmilha ħafna aktar faċli għall-kumpaniji u aktar attraenti sabiex niġbdu aktar investiment lejn pajjiżna. Dan huwa kunċett li konna diġà għamilnieh fejn jidħlu s-servizzi finanzjarji fl-insurances. Dak iż-żmien konna l-unika pajjiż fl-Ewropa li għamilniha f’dan is-settur. Issa qed naqbdu dak il-mudell u nimplimentawh fis-settur tal-avjazzjoni u jiena konvint li ħa tkun qed trendi suċċess kbir.”
