Waqt li l-Kummissjoni Elettorali ppreżentat ir-reviżjoni tagħha tad-distretti elettorali, kif inhi obbligata bil-Kostituzzjoni, lill-Parlament din il-ġimgħa, jirriżulta li ċ-ċaqliq tal-votanti minn distrett għall-ieħor hu ta’ madwar 21,000.
Ir-rapport approvat b’sitt voti kontra ħamsa jikkuntrasta mar-rapport l-ieħor ippreżentat u appoġġjat mir-rappreżentanti tal-Oppożizzjoni li jitlob li jkun hemm iċ-ċaqliq ta’ madwar 186,000 votant, li hu iżjed minn nofs jew kważi 60% tal-elettorat kollu fuq it-12-il distrett.
Ta’ min jinnota li l-Kostituzzjoni tobbliga lill-Kummissjoni Elettorali li tirrevedi biss l-ewwel 12-il distrett. Provvediment fil-liġi li jesiġu li l-ebda wieħed minn madwar 32,000 votant, skont l-aħħar Reġistru Elettorali, m’għandu jiċċaqlaq mit-Tlettax-il Distrett, dak t’Għawdex u Kemmuna, għal xi distrett differenti.
Għaldaqstant hu ċar li, fir-rapport finali tagħha, il-Kummissjoni Elettorali qablet u ħadet inkonsiderazzjoni li jsir l-inqas ċaqliq possibbli u bl-inqas inkonvenjent għall-elettur u anke l-kandidati.
Minkejja dan, l-Oppożizzjoni Nazzjonalista diġà ddikjarat li mhux se tivvota favur tali tibdil, bil-Partit Laburista jinnota tali ipokrezija, partikolarment għax din qablet mal-istess prinċipji erba’ snin ilu u llum qed toġġezzjona għall-konvenjenza.
Ma’ kull reviżjoni tad-distretti dejjem ikun hemm il-ħtieġa li jiġu aġġustati xi wħud mid-distretti minħabba li, skont il-Kostituzzjoni, l-ammonti ma jridux ikunu iżjed jew inqas mill-medja ta’ 5% mill-kwota elettorali li, skont l-aħħar Reġistru Elettorali ta’ Ottubru li għadda, hi ta’ 26,983.
Il-kwota toħroġ mid-diviżjoni tal-kważi 324,000 votant fuq l-ewwel 12-il distrett b’60, l-ammont ta’ ħames deputati eletti f’kull distrett. B’hekk, biex kull distrett ma jkollux iżjed jew inqas minn 5% tal-kwota ta’ votanti, bilfors irid ikollu l-minimu ta’ 25,634 votant u mhux iżjed minn 28,332 votant.
L-aħħar reviżjoni tal-konfini tad-distrett qabel din kienet saret f’Ottubru tal-2020, waqt li ġie approvat fil-Parlament fil-bidu ta’ Frar tal-2021 u ppubblikat xahrejn wara fil-Gazzetta tal-Gvern.
Minħabba ċaqliq ta’ residenti minn lokalità għall-oħra matul iż-żmien, il-Kummissjoni Elettorali hi obbligata li tirrevedi l-konfini mhux qabel sentejn u mhux iżjed minn ħames snin mill-aħħar reviżjoni kif meħtieġ, skont l-istess Kostituzzjoni.
Mir-rapport approvat issa tal-Kummissjoni Elettorali, joħroġ li tliet distretti – l-Ewwel, is-Sebgħa u t-Tnax – ma baqgħux konformi mal-liġi.
Fost l-oħrajn, iċ-ċaqliq approvat mill-Kummissjoni Elettorali se jara li mal-1,300 votant jonqsu mit-Tnax-il Distrett u mal-elf jiżdiedu fit-Tmin Distrett. L-inqas ċaqliq hu fil-Ħames Distrett fejn se jiżdiedu biss tmin votanti.
Dan se jara, pereżempju, li votanti minn Birkirkara jiżdiedu fl-Ewwel Distrett, waqt li oħrajn minn Tal-Pietà jaqilbu għad-Disa’ Distrett u dawk fil-parti taż-Żonqor, f’Wied il-Għajn, se jivvotaw mat-Tieni Distrett, flok mat-Tielet.
Ma’ dan, dawk residenti fiż-żona ta’ Ħal Farruġ, fil-limiti ta’ Ħal Luqa, mhux se jibqgħu mal-Ħames Distrett u, minflok, se jaqilbu għas-Sitt Distrett.
Parti mir-residenti f’Ħaż-Żebbuġ se jmorru mas-Seba’ Distrett mis-Sitt wieħed, biex din reġgħet saret tagħmel parti minn distrett elettorali wieħed. Anke l-votanti tal-Imdina, flok il-11-il Distrett kif kienu sal-lum, se jmorru fis-Seba’ Distrett.
Ftit inqas minn 4,000 resident fl-Imġarr se jaqilbu mis-Seba’ għat-Tnax-il Distrett. Mat-8,000 votant Naxxari se jonqsu mit-Tnax-il Distrett u jiżdiedu bejn it-Tmien u l-Għaxar Distrett Elettorali.
ĊAQLIQ TA’ VOTANTI FID-DISTRETTI APPROVAT MILL-KUMMISSJONI ELETTORALI
- L-1 DISTRETT: +395
- IT-2 DISTRETT: +420
- IT-3 DISTRETT: +418
- IR-4 DISTRETT: -460
- IL-5 DISTRETT: +8
- IS-6 DISTRETT: -542
- IS-7 DISTRETT: -779
- IT-8 DISTRETT: +1,021
- ID-9 DISTRETT: +462
- L-10 DISTRETT: +924
- IL-11-IL DISTRETT: -554
- IT-12-IL DISTRETT: -1,318
