Il-Ministeru għall-Edukazzjoni u x-Xogħol nieda l-Iskema tal-Boroż ta’ Studju mmirata lejn l-Arti Espressiva għal din is sena, 2019.
F’9 snin kemm ilha miftuħa din l-iskema, sa issa bbenefikaw 135 applikanti ffukati fuq diversi forom ta’ arti.
Għal din l-iskema—li toffri boroż ta’ studju għal korsijiet relatati ma’ żfin, mużika, arti viżiva, kitba kreattiva, moda, fotografija, arkitettura, teatru u korsijiet oħra li jibbażaw fuq l-arti espressiva—il-korsijiet jintagħżlu mill-applikant. Dawn iridu jkunu rikonoxxuti mil-MQRIC, l-awtorità li tirregola dawn il programmi f’Malta.
Borża ta’ studju tikkonsisti f’ammont ta’ flus li jitħallas lejn miżati ta’ tagħlim. Dawk li se jistudjaw full-time jingħataw ukoll għotjiet ta’ manteniment.
Ir-regolamenti, flimkien mal-applikazzjoni online, jinsabu fuq is-sit www.myscholarship.gov.mt. L-applikanti għandhom bżonn kont tal-e-ID attiv u jaħdem.
Jistgħu japplikaw individwi minn 11-il sena ‘l fuq, però, fil-każ ta’ minorenni l-applikazzjoni ssir mill-ġenituri.
Importanti ħafna li jiġi provdut portfolio, li jrid jinhemeż mal-applikazzjoni online. Dawk li jridu juru l-prestazzjoni artistika tagħhom għandhom jipprovdu link għall-video, filwaqt li dawk li qegħdin jaħdmu fuq l-arti viżiva għandhom jipprovdu stampi.
Għal aktar informazzjoni wieħed jista’ jċempel fuq 2598 2111 jew jibgħat email fuq artsscholarships.mede@gov.mt, kif ukoll iżur is-sit http://www.myscholarship.gov.mt hija aġġornata bl-aħħar dettalji.
L-applikazzjonijiet jibqgħu miftuħa sas-7 ta’ Awwissu 2019 sa nofsinhar (ħin lokali).
