Jitnieda r-raba’ edizzjoni tal-Fond Nazzjonali tal-Komunità STEM – żieda ta’ 300% fil-fondi allokati
Tnediet ir-raba’ edizzjoni tal-Fond Nazzjonali tal-Komunità STEM għal din is-sena. Dan tħabbar waqt konferenza tal-aħbarijiet mis-Segretarju Parlamentari responsabbli mir-Riċerka u l-Innovazzjoni, Keith Azzopardi Tanti.
Dan il-fond, li huwa mmexxi miċ-Ċentru Interattiv tax-Xjenza, Esplora, f’isem Xjenza Malta, għandu l-għan li jispira u jappoġġja proġetti fil-komunità li jiffokaw fuq ix-Xjenza, it-Teknoloġija, l-Inġinerija u l-Matematika.
Il-fond iħeġġeġ lill-iskejjel, kunsilli lokali, mużewijiet, NGOs u gruppi oħra fil-komunità biex japplikaw. Dawn l-entitajiet huma mistiedna jaħdmu ma’ professjonist fuq STEM sabiex joħolqu proġetti li jkunu kemm innovattivi fil-qasam xjentifiku kif ukoll ta’ benefiċċju tanġibbli u sostenibbli għall-komunitajiet tagħhom.
Is-Segretarju Parlamentari Azzopardi Tanti stqarr li Il-Gvern impenjat li jkompli jinvesti u jibni s-setturi tar-riċerka u l-innovazzjoni.
“Permezz ta’ din l-iskema STEM, il-Gvern qiegħed saħansitra jżid il-fondi allokati bit-300%. Dan għaliex nemmnu fis-suġġetti tax-Xjenza, Teknoloġija, l-Inġinerija u l-Matematika u rridu nwassluhom fil-qalba tal-komunitajiet tagħna.”
Segretarju Parlamentari, Keith Azzopardi Tanti
Il-Kap Eżekuttiv ta’ Xjenza Malta, Silvio Scerri, spjega li iċ-ċentru Interattiv tal-Esplora iħajjar studenti biex jieħdu suġġetti relatati max-xjenza.
“L-idea hi li nippreżentaw ix-xjenza b’mod sempliċi. Filfatt hawnhekk nagħmlu ħafna temi xjentifiċi u l-attivitajiet li għandhom x’jaqsmu max-xjenza biex nippreżentaw ix-xjenza b’mod li titwassal lil kulħadd b’mod sempliċi, mhumiex suġġetti diffiċli u dak huwa l-għan tal-Esplora u din is-sena ħa nerġgħu għar-raba’ sena nħabbru dan il-proġett fejn imorru fil-komunitajiet ħalli nħajru gruppi ta’ studenti jipparteċipaw flimkien biex joħolqu proġett relatat max-xjenza.”
Lap Ezekuttiv, Xjenza Malta
Is-suġġetti STEM mhux biss għandhom rwol edukattiv jew akkademiku, iżda huma kruċjali għall-ekonomija tal-futur tagħna, ekonomija li tkun sostenibbli, diġitali, u mibnija fuq ħiliet ta’ kwalità.
Fl-edizzjoni tas-sena l-oħra tqassmu €24,000 f’fondi u ġew appoġġjati firxa ta’ proġetti li raw kollaborazzjoni bejn istituzzjonijiet fil-komunità u professjonisti STEM.
L-applikazzjonijiet għall-edizzjoni ta’ din is-sena tal-Fond Nazzjonali tal-Komunità STEM huma miftuħa sat-23 ta’ Mejju.
