Il-Ministeru għall-Edukazzjoni nieda l-prospett għas-sena d-dieħla tal-programm tal-Lifelong Learning, li se jinkludi aktar minn 450 kors fuq 72 suġġett differenti.
Dwar dan ONE News tkellem mas-Senior Manager tal-Lifelong Learning, Christianne Gatt Fenech, li elenkat numru ta’ korsijiet differenti u ġodda li jinkludi dan il-prospett.
Hija fissret: “Għandna bosta korsijiet ġodda li jinkludu l-bring your own device, learning through play, child and adoloscent development, gardening u basic homecare and well being jiġifieri għandna ħafna suġġetti ġodda u sbieħ.”
Spjegat ukoll kif persuna jista’ japplika għal dawn il-korsijiet: “Għal dawn it-tip ta’ korsis jista’ japplika billi jew imur fuq is-sit elettroniku tagħna www.lifelonglearning.gov.mt jew inkella jiġu l-Furjana bejn it-08:30 u 12:30, f’xi servizz.gov hubs li għandna f’Malta u Għawdex u anke Kunsilli Lokali.”
Hija temmet tgħid kif f’ħafna istanzi l-lifelong learning adattat il-korsijiet tagħha sabiex isiru online. B’hekk min ikun qed jirċievi t-tagħlim ikun jista’ jagħmel dan b’iktar flessibiltà u kumdità.
Il-Ministru għall-Edukazzjoni Justyne Caruana esprimiet is-sodisfazzjon tagħha għal dan, u fakkret kif fl-2019, 11.9% tal-persuni bejn 25 sena u 64 sena għażlu li jkomplu jistudjaw.
Hija sostniet: “Hemm ħafna opportunitajiet u biex dak li jkun ikun ikompli jista’ jieħu dawn l-opportunitajiet irid ikollu l-kwalifiki u t-taħriġ meħtieġ u aħna dak qed noffruh anke permezz ta’ dawn il-korsijiet li nedejna llum.”
