Fuq ix-xandir nazzjonali, il-Ħamis filgħaxija spikkaw l-attakki u l-ġlied bejn iż-żewġ fazzjonijiet fil-Partit Nazzjonalista.
Uħud iridu akkost ta’ kollox lil Adrian Delia jitlaq u oħrajn iridu li dan jitħalla jaħdem.
Ivan Bartolo, deputat Nazzjonalista li m’ilux ħafna li tela’ fil-Parlament spjega r-raġunijiet tal-fazzjoni li issa tinsab wara Therese Comodini Cachia, għala Delia għandu jtir.
Ivan Bartolo qal, “Ejja nkunu irġiel, aħna eleġġejna Kap biex nirbħu elezzjoni. Mela l-ewwel fatt hu li s-surveys kollha li joħorġu minnkom u li joħorġu anke minn oħrajn, nafu li dan kulħadd qed jgħid li dan il-bniedem ma jistax iwassal lill-Partit Nazzjonalista li jkun fil-Gvern.”
Ivan Bartolo li s-sena l-oħra ġab il-firem biex Delia jiġi sfiduċjat fil-Kunsill Ġenerali infexx jgħajjar il-ħiliet tal-Kap Nazzjonalista.
Żied jgħid, “Żbalji fundamentali li unfortunately ir-raġel forsi ma ħasibx f’ċertu ammont ta’ ħiliet li kellu bżonn biex jasal…” u kompla billi qal, “Għandek bżonn strategy group madwarek. U tiġix tgħidli li għandek strategy group, irid ikollok strategy group, irid ikollok l-aqwa nies li hawn f’dan il-pajjiż, f’dak l-istrategy group. X’qed tagħmel biex attirajthom, ħa jiġu? Dak l-istrategy group se jpoġġi u se joħloq viżjoni.”
Fil-programm intervjena wkoll Edwin Vassallo, deputat Nazzjonalista leali lejn il-fazzjoni Delia.
Vassallo li ta intervista qabel u ma poġġiex ħdejn id-deputat Nazzjonalista l-ieħor Ivan Bartolo, qal li l-partit tal-maduma ilu jitlef u ħadd qatt qabel ma tniffes.
“Ma kienx survey? Imma ħadd, l-ebda eżekuttiv ma kien jitlob lil Eddie Fenech Adami għax konna nitilfu elezzjoni wara elezzjoni biex jirriżenja. Ħadd ma kien jitlob lil Lawrence Gonzi jirriżenja. Ħadd ma kien jitlob. Illum għax isiru surveys f’sena kull xahar u nofs, issa qed ittina rasna għax qegħdin nitilfu. Aħna ilna nitilfu minn qabel ġie Adrian Delia.” Qal Vassallo.
Vassallo spjega l-attakki ġejjin mill-fazzjoni ta’ Simon Busuttil.
Vassallo qal “Qisu Adrian Delia kien l-ikbar kriminal f’dan il-pajjiż.” u kompla jgħid, “Jiena ma narahx il-bniedem li qegħdin jgħidu li hu.”
Pronta kienet it-tweġiba ta’ Ivan Bartolo.
“Edwin qal li aħna, li Adrian Delia mhux kriminal, jien naħseb ħadd ma qal li Adrian Delia hu kriminal.” Qal Bartolo.
Intant Bartolo, esponent tal-fazzjoni li trid lil Delia jitlaq’ kompla bil-kliem iebes fil-konfront tal-kap.
“Dan il-bniedem qed iwebbes rasu meta fil-verità kulħadd qed jgħidlu u kulħadd ifhmni qed jgħid ejja ningħaqdu, il-marelli. Ingħaqad il-grupp parlamentari, ingħaqad l-eżekuttiv, issa hemm maġġoranza fl-eżekuttiv, daħlu nies prominenti jitkellmu, x’irid jingħaqad iżjed.” Qal Bartolo.
Vassallo imbagħad argumenta kif l-istatut tal-Partit Nazzjonalista qed nagħmluh taċ-chewing gum.
“Jiġifieri aħna li nippruvaw fil-Gvern u fil-pajjiż ngħidu li nirrispettaw is-saltna tad-dritt, nirrispettaw il-Kostituzzjoni, imbagħad aħna għandna s-saltna tad-dritt, l-istatut, nagħmluh taċ-chewing gum, nagħmluh statut li kulħadd jipprova jdawwar kif irid hu. Biex inkeċċik għandi statut imma biex jiena nibqa’, dak ma jgħoddx l-istatut.” Qal Vassallo.
Bartolo ma qagħadx lura milli jiġbed l-attenzjoni li Delia qed iġib l-iskużi, b’Vassallo ma għadx jogħmodha meta mistoqsi dwar il-ġlied u l-firda fil-partit f’tal-Pietà.
Bartolo qal, “U ma bir-rispett kollu ma tistax tibqa’ tinħeba wara l-iskuża għax kulħadd jew ħadd ma ħallik taħdem.”
Il-ġurnalist saqsa lil Vassallo, “Hemm ħafna bath blood, mhux hekk?” u Vassallo wieġeb, “Bath blood hemm ħafna, bath blood hemm ħafna.”
Edwin Vassallo imbagħad semma li kieku kulħadd għamel bħalu, il-Partit Nazzjonalista qiegħed fuq it-taraġ ta’ Kastilja.
“Imma jekk kulħadd jagħmel bħali, u kieku kulħadd għamel bħali, kieku qegħdin fuq it-taraġ ta’ Kastilja biex nirbħu l-Gvern.” Qal Vassallo.
Bartolo saħansitra wieġeb għall-botti diretti lejh minn Delia u n-nies ta’ madwaru.
“Jiena wieħed minn dawk in-nies li lili jakkużani li jiena ġej u sejjer, immur, nipprova, taqbiżli jew niddejjaq u nitlaq. U vera mort kemm il-darba u ġejt pero nibqa’ mmur għax inħobb il-partit, nibqa’ mmur għax inħobb il-pajjiżi pero Adrian Delia ma kienx qed jinduna li jiena qed nitlaq minħabba l-leadership styles tiegħu.” Qal Bartolo.
Intant fil-programm spikkat osservazzjoni li għamel il-preżentatur fejn kien kostrett jipprova jżomm il-bilanċ bejn il-fazzjonijiet f’partit maqsum u mifrud aktar minn qatt qabel.
“Jiena s-soltu meta nkun fi programm bħal dan, il-parkondiċju, il-bilanċ tal-opinjoni tkun bejn il-Partit Nazzjonalista u l-Partit Laburista, il-Partit Laburista u l-Partit Nazzjonalista. Din id-darba rrid inżomm il-parkondiċju bejn il-fehmiet differenti fil-Partit Nazzjonalista. Jiġifieri jiena fl-esperjenza tiegħi ta’ issa qed jagħmel bija wkoll iż-żmien, qatt ma kelli din ir-realtà.” Stqarr Balzan.
