Tlesta r-restawr tat-Torri tal-Wardija fiż-Żurrieq; restawr li sar mid-Direttorat tar-Restawr bis-saħħa tal-iskema tar-Restawr għall-Kunsilli Lokali.
Ir-restawr fuq it-torri, magħruf aħjar bħala t-Torre della Guardia di Giorno, sar fuq il-faċċati u fuq il-konsolidament strutturali tal-istruttura tas-soqfa u tal-ħitan tal-ġebel.
Maż-żmien, mal-faċċati kienu qed jidhru xquq estensivi u kien hemm deterjorament tal-ġebel. Fejn kien possibbli, ma saritx sostituzzjoni tal-ġebel.
Id-Direttur tad-Direttorat tar-Restawr, il-Perit Nobert Gatt, qal li ħafna ċangaturi tas-soqfa tal-ġebel kienu fi stat ħażin, u li l-istruttura tal-arkata ddeterjorat ħafna minħabba li daħal fiha ħafna ilma.
Minħabba l-istat avvanzat ta’ deterjorament, iċ-ċangaturi tal-ġebel ġew sostitwiti b’materjal ġdid. Anki s-saqaf ġie rrestawrat biex tiġi evitata aktar infiltrazzjoni tal-ilma billi t-torba eżistenti reġgħet ġiet invellata biex jinkisbu gradjenti xierqa.
L-aperturi kollha nstab li ma setgħux jintużaw u għalhekk ġew sostitwiti b’aperturi ġodda tal-injam.
Meta żar it-Torri flimkien mas-Segretarju Parlamentari għall-Gvern Lokali, Alison Zerafa Civelli, iI-Ministru għall-Wirt Nazzjonali, l-Arti, u l-Gvern Lokali, Owen Bonnici, qal li proġetti bħal dawn ikomplu juru biċ-ċar l-impenn tal-Gvern lejn il-wirt storiku fil-lokalitajiet tagħna.
Il-Ministru Bonnici stqarr, “Pajjiżna mimli wirt storiku li jrid jiġi rrestawrat u kkonservat, u x-xogħol tad-Direttorat tar-Restawr huwa wieħed li jagħmel id-differenza, kif rajna fit-Torri tal-Wardija, taż-Żurrieq, fejn ħdimna id f’id mal-Kunsill Lokali taż-Żurrieq u rajna dan il-wirt storiku li qabel kien mitluq jiġu mogħti l-ħajja mill-ġdid. Aħna se nkomplu għaddejjin b’iktar xogħol favur iktar restawr ta’ wirt storiku f’pajjiżna.”
Minn naħa tagħha, is-Segretarju Parlamentari Alison Zerafa Civelli qalet li postijiet storiċi bħal dan it-torri għandhom jibqgħu jiġu rrestawrati sabiex naċċertaw li dak li ħallew ta’ qabilna jibqa’ jiġi apprezzat mill-ġenerazzjonijiet ta’ warajna, filwaqt li nkunu qed noħolqu valur ġdid fil-lokalitajiet.
Zerafa Civelli qalet, “L-irwol tal-Kunsilli Lokali fi proġetti bħalma qed niċċelebraw illum permezz tar-restawr fuq it-Torri tal-Wardija huwa importanti ħafna għaliex il-Kunsill Lokali jkun qed iressaq ’il quddiem ix-xewqat tar-residenti tiegħu u hekk ġara f’dan il-proġett li llum qed ninawguraw.”
