It-Tlieta filgħodu tħabbru 16-il proġett ambjentali, f’diversi lokalitajiet madwar il-pajjiż kollu b’investiment ta’ €10 miljun b’kofinanzjament ta’ fondi ewropej.
Dan waqt konferenza tal-aħbarijiet, li għaliha attenda il-Prim Ministru Robert Abela flimkien mal-Ministru għall-Ambjent, l-Enerġija u l-Intrapriża Miriam Dalli, hekk kif ġie mħabbar li b’kollox dawn il-proġetti se jfissru total ta’ 80,000 metru kwadru ta’ spazji miftuħa biex jitgawdew mill-pubbliku – Dan ifisser li l-proġetti f’daqqa jammontaw għal spazju għaxar darbiet id-daqs tal-Fossos tal-Floriana.
F’din il-konferenza ġie spjegat li dawn il-proġetti tħabbru erba’ xhur biss wara t-tnedija tal-Aġenzija Project Green, bħala parti mill-iskema tal-Community Greening Grant.
Għal dawn il-proġetti fiż-żmien li ġej se jkunu qed jiġu sottomessi l-applikazjonijet għand l-awtoritajiet hekk kif bħalissa qed jiġu konklużi l-ewwel fażi ta’ konsultazzjonijiet.
Fid-diskors tiegħu l-Prim Ministru Robert Abela tenna kif din l-iskema hija waħda minn ħafna li qed jiprijoritizza dan il-Gvern sabiex jagħmel tajjeb għax-xewqa tan-nies.
“Kien propju fl-ewwel jum tal-kampanja elettorali tal-2022 li għamilna wegħda ċara mal-poplu tagħna dwar dawn il-proġetti, għalhekk bħala Gvern u ħa nitkellem bħala Gvern sħiħ, impenjati bis-sħiħ li nsostnu dan l-investiment kbir mifrux mal-pajjiż kollu u f’livell li qatt ma sar bħalu qabel.”
Dr Abela tenna wkoll kif dan il-proġetti nibtu mill-qalba tal-komunitajiet frott konsultazzjoni estensiva.
“Dawn huma proġetti li nibtu mill-qalba tal-komunitajiet jiġifieri minn isfel għal fuq. L-għażla dwar liema proġetti għażilna li ninvestu fihom b’din l-iskema, għamluha l-komunitajiet infushom. Fil-fatt, dawn il-proġetti li qed nitkellmu dwarhom illum li qed jifirxu min Nofsinhar ta’ Malta sa Għawdex huma lkoll proposti diretti tal-Kunsilli Lokali u tal-Għaqdiet mhux Governattivi.”
Il-Prim Ministru spjega wkoll il-miri sabiex jitlestew dawn il-proġetti mill-isbaħ f’pajjiżna. Mira li se toħodna sas-sena 2025.
“Sas-sena 2025 se nkunu lestejna x-xogħol kollu fuq 80,000 metru kwadru ta’ investiment fi spazji ħodor u miftuħa li se nkunu qed inniedu llum. F’dan il-proġetti mbagħad qed nitkellmu li se jitħawlu madwar 6,500 siġra ġdida.”
Minn naħa tagħha fid-diskors tagħha, il-Ministru Miriam Dalli spjegat li mat-80% ta’ dawn il-proġetti mhux se jkun qed jinvolvi konkos jew pavimentar.
“Aktar minn 80% tal-ispazji ta’ dawn il-ġonna mhumiex se jkunu miksija b’konkos jew pavimentar imma se jkunu miksija b’materjal poroż bħal ħamrija li tassorbi l-ilma tax-xita għaliex irridu nżidu l-ħażniet naturali tal-ilma u nnaqsu l-għargħar.”
Il-Kap Eżekuttiv tal-Aġenzija Project Green Steve Ellul sostna li l-għan ta’ dawn il-proġetti ambjentali huwa li mal-110,000 persuna f’pajjiżna jkollhom spazju miftuħ għaxar minuti biss il bogħod bil-mixi. B’hekk wieħed minn kull 5 persuni f’pajjiżna jkun intlaħaq b’dawn il-proġetti ambjentali.
Fost il-proġetti magħżula hemm proġetti differenti ta’ kull daqs u li jvarjaw minn pocket gardens sa sports park, b’uħud minnhom anke f’postijiet li jistgħu jiġu żviluppati.
Fil-konferenza ġie spjegat li ingħataw prijorità żoni li huma urbanizzat fil-pajjiż fosthom Santa Venera u Birkirkara fejn huma pjanati żewġ ġonna ġodda ta’ aktar minn 5,000 metru kwadru kwadru bl-involviment dirett tal-komunita u għaqdiet volontarji u ambjentali.
L-istess se jsir fl-Imtarfa u Marsaxlokk. Hemmekk pjanati żewġ proġetti ta’ 7,500 metru kwadru fil-qalba tar-residenzi.
Intant ġie spjegat ukoll kif l-investiment massiċċ ta’ €10 miljun jinkludi wkoll maintenance plan ta’ 10 snin għal dawn is-sittax-il proġett.
“Qed ninvestu wkoll f’maintenance plan għal tul ta’ żmien. Fil-fatt kull wieħed minn dawn is-16-il proġett qed jiġi b’maintenance pla għal mill-inqas 10 snin sħaħ għaliex qed naraw li kull ewro li ninvestu, ninvestuhom fi spazji ġodda imma ninvestuhom fi spazji ġodda ta’ kwalità biex il-familji tagħna jgawduhom għal tul ta’ snin.”
