Grupp ta’ żgħażagħ stennew għal madwar 14-il siegħa quddiem ħanut f’Tas-Sliema biex dalgħodu jkunu l-ewwel persuni f’Malta li jixtru l-iPhone il-ġdid, iPhone X.
Huma kienu ilhom mit-20:00 tal-bieraħ filgħaxija jistennew quddiem il-ħanut sakemm dalgħodu l-istess ħanut fetaħ il-bibien tiegħu għall-ewwel klijenti.
F’ritratti li tpoġġew fuq il-paġna uffiċjali tal-ħanut iCentre, kitbu kif tul dawn l-aħħar għaxar snin ta’ tnedijiet ta’ iPhones żgur mhux forsi li dawn huma l-akbar fanatiċi li qatt ltaqgħu magħhom.
L-iPhone X ħoloq furur kbir hekk kif id-dehra tiegħu hi waħda ferm differenti minn dik li s-soltu ħabbru Apple fl-iPhones passati. Kienu mijiet ta’ Maltin li rreġistraw isimhom biex ikunu minn tal-ewwel biex jixtruh.
