Kien funeral sempliċi, kif ried il-Papa Benedittu XVI, fejn kien hemm sens kbir ta’ ġabra fost l-eluf kbar ta’ nies li kienu preżenti.
Dan intqal mill-Ambaxxatur ta’ Malta għas-Santa Sede, Frank Zammit, li ddeskriva l-mument x’ħin in-nies preżenti bdew jitolbu lill-amministrazzjoni tas-Santa Sede sabiex minnufih tagħmel lill-Papa Benedittu XVI qaddis.
“Kien hemm sinjali wkoll, lejn l-aħħar tal-quddiesa, fejn il-Papa u l-Kulleġġ tal-Kardinali semgħu lill-poplu t’Alla jgħajjat “Santo subito” u anki “Dottore della Chiesa”. In-nies jaraw f’Joseph Ratzinger, li issa ’l quddiem il-Knisja televah mad-dutturi tal-Knisja u anki nstemgħet ukoll il-kelma, l-aġġettiv, “Magno” – kbir, jiġifieri tant kien hemm kwiet, dan l-għajat ħareġ veru ċar fil-Pjazza.”
L-Ambaxxatur ta’ Malta għas-Santa Sede qal li dan il-messaġġ jista’ jwassal biex il-kanonizzazzjoni tal-Papa Benedittu XVI issir aktar malajr, bħalma ġara fil-każ tal-Papa Ġwanni Pawlu II.
“Jiġifieri issa rridu naraw kif, it-triq li se tieħu l-Knisja, jekk hux se tagħtih deroga fil-proċess tiegħu biex jibda x-xogħol fuq il-canonisation tiegħu jew le. Jiġifieri dawn huma sinjali li jibdew jidhru fl-ewwel ġimgħat wara d-difna tiegħu.”
L-Ambaxxatur Zammit spjega li qabel il-konklavi li fihom laħaq il-Papa Benedittu XVI, il-kardinali kienu qablu biex il-Papa elett jiddikjara lill-predeċessur tiegħu, il-Papa Ġwanni Pawlu II, mill-ewwel qaddis mingħajr ma jsir il-proċess normali.
“Pero, Benedittu ma ħax dik it-triq. Benedittu neħħielu d-deroga ta’ ħames snin biex il-proċess jibda mill-ewwel. Pero, Benedittu kien jgħid li ‘ma kienx ikun fair ma’ Karol Wojtyla kieku eżentajtu mill-proċess’, għax hu ried juri l-kobor tal-Papa fil-proċess.”
