Fil-ġimgħa għas-servizz pubbliku, is-Segretarju Permanenti Ewlieni Mario Cutajar żar żewġ entitajiet li fix-xhur li għaddew ġew mogħtija il-Quality Award li jassigura l-ogħla kwalità ta’ servizz.
L-entitajiet huma ċ-Ċentru Nazzjonali tat-Trasfużjoni tad-Demm u l-Aġenzija Żgħażagħ.
Fl-ewwel żjara tiegħu, Mario Cutajar ntlaqa’ u ddawwar mal-post minn Dr Alex Aquilina, id-Direttur tas-Servizz Nazzjonali tat-Trasfużjoni tad-Demm.
Il-Kap taċ-Ċivil ġie infurmat li l-kwalità tas-servizz tant hija eċċellenti li jirrikorri għalih anke s-settur privat.
Is-Sur Cutajar ingħata tagħrif dwar il-proċess kollu minn meta jittieħed id-demm sakemm dan jiġi sseparat f’komponenti differenti permezz ta’ forzi ta’ ċentrifugi.
Ra wkoll it-tissue bank tal-corneas, fejn id-demm jiġi ffiltrat skont standards internazzjonali.
Barra minn hekk, iddawwar mat-taqsima li bħalissa qed tintuża biex fiha jingħata t-tilqim kontra l-Covid-19.
Fl-Aġenzija Żgħażagħ imbagħad Mario Cutajar intlaqa’ mill-Kap Eżekuttiv, Miriam Theuma.
Huwa ddawwar mal-post filwaqt li ngħata tagħrif dwar il-bosta attivitajiet li jiġu organizzati għaż-żgħażagħ u li huma edukattivi u divertenti fl-istess ħin.
Intant fiż-żewġ postijiet, Mario Cutajar saħaq li l-Quality Award tas-Servizz Pubbliku jingħata lil dipartimenti u entitajiet li jagħtu servizz eċċellenti lill-klijenti tagħhom.
Qal li dan irid jiġi sostnut u mkejjel permezz ta’ Quality Service Charters biex b’hekk niżguraw l-aqwa servizz u l-ogħla standards.
Fiż-żewġ postijiet is-Segretarju Permanenti Ewlieni iffirma l-Quality Service Charter rispettiv.
