10 ijiem ilu Raymond Caruana rriżenja minn kunsillier tal-Partit Nazzjonalista fiż-Żejtun u sal-lum ħadd mit-tmexxija jew mill-amministrazzjoni tal-Partit Nazzjonalista ma kellmu.
“Meta jien tfajt ir-riżenja tiegħi… mir-riżenja tiegħi ’l hawn ebda konferma li tgħidli isma’ jien irċivejt l-ittra tiegħek, għidli x’ġara,” qalilna Caruana li spjega kif mar bl-ittra personalment biex ikun ċert li waslet.
F’intervista mal-gazzetta KullĦadd Ray Caruana spjega kif għalih iż-Żejtun ifisser ħafna u daqstant ieħor għal snin twal fisser il-Partit Nazzjonalista. Tant li fl-aħħar elezzjoni tal-Kunsilli Lokali kkontesta f ’ismu u kien l-iktar wieħed li ġab voti f ’isem l-istess partit.
“Jien fl-aħħar elezzjoni, f ’Marzu tal-2013, tlajt elett mill-ewwel b’957 vot. Kien riżultat ferm pożittiv għalija, l-ewwel darba. Qatt ma immaġinajt li l-ewwel darba se nġib dik il-maġġoranza ta’ voti,” qalilna Caruana li tkellem dwar l-involviment tiegħu fil-partit. “Kont ilni involut fil-Partit Nazzjonalista iktar minn 15–il sena. Għalija l-Partit Nazzjonalista kien il-partit li stajt nikkontesta elezzjoni miegħu.
Però llum il-ġurnata qed nara li kif għaddeja s-sitwazzjoni, u fis-sitwazzjoni tiegħi, ma nistax naħdem komdu kif nixtieq,” qal Caruna li tenna kif minn dejjem kien miġbud lejn il-Partit Nazzjonalista. Għalih l-għażla naturali biex permezz tiegħu jgħin ir-raħal li jgħix fih. Għal dawn l-aħħar ħames snin ħadem bħala kunsillier u esprima l-fehma li x-xewqat tiegħu favur ir-resident u d-direzzjoni tal-partit mhux dejjem iltaqgħu flimkien. Dan sakemm ftit xhur qabel elezzjoni oħra tal-Kunsilli Lokali rriżenja mill-Partit Nazzjonalista.
X’wasslu jirriżenja ftit xhur qabel elezzjoni oħra? Iwieġeb b’mod skjett. “Ridt nibgħat messaġġ għax jien dejjem kont leali. Kienu mumenti ibsin għalija biex nieħu deċiżjoni bħal din. Kienu mumenti fejn kelli nitlob l-għajnuna,” qal Caruana li semma fost dawk li tawh spalla kien hemm is-Sindku attwali taż-Żejtun. “Ma setax ikun naħdem ma’ partit li lili tefagħni mal-ġenb… is-sitwazzjoni hi ħafna drabi, jien hekk rajtha, li min verament jaħdem għall-ġid ta’ dak li jkun ma tantx iqisuh,” qal Caruana li kompla li hemm numru ta’ persuni li “għall-partit huma renjanti ħafna.”
Jidher ċar li Caruana mhux wieħed minnhom. “Mill-amministrattiv ma kellimni ħadd. Lanqas mill-eżekuttiv. Jien kont nippretendi li s-Segretarju Clyde Puli tkun l-ewwel persuna li lili jgħidli x’ġara. Minn dakinhar li bgħatt ir-riżenja tiegħi, madwar ġimagħtejn ilu, għadni ma rċivejt ebda risposta mill-amministrazzjoni,” qal Caruana li jħoss li dan l-aġir ifisser li reġa’ ġie tradut. “Tradut minn esponenti tal-partit li dejjem ħdimt għalih. Dejjem għamilt dak li xtaqu huma…is-sitwazzjoni kellha tinbidel. Kienet ilha ġejja. Qatt ma taw kas ċerti affarijiet,” qal Caruana.
F’mument fejn il-Partit Nazzjonalista jinsab maqsum f ’diversi fazzjonijiet Caruana jgħid li lilu ma ta kasu ħadd. “Qatt ma stajt nimmaġina li partit glorjuż bħal dan jiġi f ’din is-sitwazzjoni,” qal Caruana li kkundanna l-mod kif qed isiru l-attakki familjari u personali. “Il-politika ma tistax tkun mezz li tifred,” insista Caruana li tenna iktar minn darba li “l-partit ma kienx jistħoqqlu hekk.” “Lanqas kien jistħoqqlu jiġi f ’sitwazzjoni li ma jkunx oppożizzjoni serja kif jixtieq ilpajjiż… għax fl-aħħar mill-aħħar il-pajjiż jitmexxa bi gvern u oppożizzjoni u l-oppożizzjoni għandha tkun serja,” qal Caruana li tenna li kien hemm żmien fejn kien konvint li Adrian Delia seta’ jġib il-partit ’il quddiem.
“Fil-partit hemm min irid ifarrak u jkisser,” qal Caruana. Mistoqsi għaliex ma baqax fil-Partit Nazzjonalista biex jgħin il-kawża ta’ Delia, Caruana kien ċar. Anke fi żmien Delia weġġa’. “Meta int tipprova taħdem biex iġġib ċerti affarijiet ’il quddiem u tara t-tfixkil ifisser li m’hemmx ħeġġa biex il-partit iġib il-partit ‘il quddiem,” qal Caruana li għamilha ċara li l-komunità Żejtunija tibqa’ għal qalbu. Komunità li jgħinha grazzi wkoll għal kollaborazzjoni u teamwork li hemm mal-maġġoranza mmexxija mill-Partit Laburista fl-istess kunsill.
“Fuq kollox aħna qegħdin hemm għar-resident,” temm jgħid Caruana. Kont ilni involut fil-Partit Nazzjonalista iktar minn 15–il sena. Għalija l-Partit Nazzjonalista kien il-partit li stajt nikkontesta elezzjoni miegħu
