Fil-Port il-Kbir se jirritorna l-Valletta Pageant of the Seas. Din ir-raba’ edizzjoni ta’ dan l-ispettaklu varjat se tkun iddedikata lit-80 anniversarju mill-wasla tal-konvoj, magħruf bħala ta’ Santa Marija, nhar il-15 ta’ Awwissu tal-1942.
Dan l-avveniment, li jsir kull sentejn,issa sab postu fil-kalendarju tal-Port il-Kbir. Għall-ewwel darba minn wara l-pandemija, nhar is-Sibt 25 ta’ Ġunju, il-pubbliku huwa mistieden isegwi l-avveniment f’Xatt il-Barrieri, il-Belt Valletta.
Il-Ministru għall-Wirt Nazzjonali, l-Arti, u l-Gvern Lokali, Owen Bonnici, kellu kliem ta’ tifħir għal avvenimenti bħal dawn, li qed jibqgħu jżommu l-kultura ħajja. Esprima s-sodisfazzjon tiegħu dwar il-fatt li, wara waqfa ta’ sentejn, tiista’ terġa’ tingħata spinta u ħajja mill-ġdid lill-wirt kulturali u l-identità tagħna l-Maltin.
Qal, “Aħna dan l-event huwa għal qalbna ħafna għax ikompli jsammar mhux biss is-sbuħija tal-Port il-Kbir – għax kull min se jiġi se jara s-sbuħija tal-Port – imma anki s-sbuħija tat-talent artistiku Malti.”
Iċ-Chairman tal-Aġenzija Kulturali għall-Belt Valletta, Jason Micallef, ħeġġeġ lil kulħadd biex jattendi f’Xatt il-Barrieri biex isegwi l-programm, li ser jsir kemm fuq l-art kif ukoll fuq il-baħar.
Qal, “Huwa spettaklu ggarantit ħafna li jiena eċitat ħafna li se nkunu qed inrodduh lura lill-pubbliku Malti fil-25 ta’ Ġunju li ġej.”
L-attivitajiet fil-25 ta’ Ġunju se jibdew fit-8 ta’ filgħaxija bit-Tellieqa Telliqun – kompetizzjoni divertenti fil-Port il-Kbir bejn numru ta’ timijiet li se jtellqu l-inġenji tal-baħar li jkunu bnew huma stess. Dan se jagħmluh mingħajr l-użu ta’ mqadef, magni, jew għajnuna oħra. Kull inġenju tal-baħar se jkun imsemmi għall-vapuri tal-forzi navali Brittaniċi li kienu preżenti fi żmien it-Tieni Gwerra Dinjija.
Is-serata mbagħad tissokta b’kunċert ta’ mużika popolari u b’effetti bid-dawl li ser ieħdu lill-udjenza lura fiż-żmien għall-era tal-erbgħinijiet. Fl-istess ħin, se ssir ukoll edizzjoni speċjali tar-regatta bil-lejl, bil-parteċipazzjoni ta’ sitt klabbs minn madwar il-Port.
L-attività ewlenija se tkun tikkonsisti f’esperjenza teatrali u awdjoviżiva li se tesplora l-esperjenza tal-Maltin matul dawk iż-żminijiet permezz ta’ projezzjonijiet fuq il-faċċata tal-Forti Sant’Anġlu.
Is-serata tagħlaq bil-kbir permezz ta’ installazzjoni bin-nar fuq il-baħar u spettaklu kbir tal-logħob tan-nar.
Dan il-proġett qed isir bl-appoġġ tal-Visit Malta, tal-Forzi Armati, u t-Tug Malta.
