Raġel jista’ jqis ruħu xxurtjat wara li rebaħ €196,457. Huwa lagħab sett ta’ numri li ra miktubin fuq dgħajsa, waqt li kien qed jgħum.
Il-biljett rebbieħ kien inxtara mill-Ħamrun. Huwa qata’ l-ewwel ħames numri u b’hekk rebaħ it-tieni kategorija tas-SUPERSTAR. B’kollox f’din il-lotterija ttellgħu seba’ numri.
Ir-raġel qal li jipparteċipa regolarment fil-logħob tal-Maltco Lotteries, b’diversi numri li jiltaqa’ magħhom fil-ħajja ta’ kuljum. Spjega li malli ra n-numri miktubin fuq id-dgħajsa, huwa mar jiktibhom malajr, ħalli jieħu ċans bihom. Huwa lagħabhom f’żewġ kompetizzjonijiet differenti: Super 5 u SUPERSTAR, u rebaħ f’din tal-aħħar.
Huwa esprima wkoll l-emozzjonijiet li ħass meta induna li rebaħ b’dawn in-numri. Tenna li huwa kellu jiċċekkja fuq Facebook għaliex ma setax jemmen li rebaħ.
Huwa temm jgħid li se jaqsam dan il-premju mal-membri tal-familja tiegħu,
Maltco Lotteries stqarret li b’kollox kien hemm aktar minn 1,000 rebbieħ ieħor li rebħu fis-seba’ kategoriji tas-Superstar li ttellgħet fil-25 ta’ Ġunju.
