Gaetano Campailla ta’ 52 sena minn Siracusa nżamm arrestat wara li tressaq il-Qorti b’rabta mal-10 kili droga kannabis li nstabu f’karozza li waslet Malta bil-katamaran mill-Port ta’ Pozzallo fi Sqallija. Hu ġie akkużat b’pussess u b’importazzjoni tal-kannabis.Is-sejba tad-droga saret l-Erbgħa permezz tal-kelb tad-Dwana msejjaħ Sparky, kelb li beda jdur mal-karozza tal-Isqalli fejn minkejja li l-ewwel tfittxijiet ma taw l-ebda riżultati l-kelb ma qatax qalbu u baqa’ jiġbed l-attenzjoni tas-sid tiegħu.
Kien għalhekk li qam suspett li d-droga setgħet kienet moħbija fil-kompartamenti tal-karozza. Kienet għal din ir-raġuni, li l-karozza ttieħdet fil-garaxx tal-Pulizija fejn l-esperti tal-Pulizija żarmaw diversi partijiet tal-karozza u ħarġu d-droga li kienet moħbija f’żewġ bibien.
L-ispettur Mark Mercieca qal li l-valur tad-droga kannabis kienet tammonta għal €20,000.
L-Isqalli wieġeb mhux ħati fejn inzamm arrestat.
