Lenel Abasia, Olandiż ta’ ħamsin sena, nżamm arrestat wara li allegatament bela’ kilo droga kokaina li kienet maqsuma f’diversi kapsoli.
Fil-Qorti, huwa ġie mixli bl-importazzjoni u pussess aggravat tad-droga.
L-imputat daħal f’pajjiżna permezz ta’ titjira minn Eindhoven, bil-Pulizija Maltija kellha informazzjoni li l-imputat seta’ kien qiegħed iġorr id-droga.
Huwa kien segwit mill-Ajruport Internazzjonali ta’ Malta u twaqqaf f’Burmarrad meta kien qiegħed f’taxi li qabad mill-Ajruport.
Wara ittieħed lejn l-isptar fejn scans li sarulu wrew li kien bela’ l-kapsoli li kien fihom id-droga kokaina.
L-Olandiż wieġeb mhux ħati għall-akkużi miġjuba kontrih.
Għaldaqstant l-imputat inżamm taħt arrest hekk kif talba għall-ħelsien ma saritx fid-dawl li l-imputat fost l-oħrajn m’għandux indirizz fiss f’Malta.
