Habtom Fishaye Kifle, Eritean ta’ wieħed u tletin sena li jgħix San Pawl il-Baħar inżamm arrestat wara li tressaq il-Qorti akkużat bi vjolenza domestika.
Il-Prosekuzzjoni mmexxija mill-Ispettur Eman Hayman spjegat kif nhar il-Ġimgħa li għadda għall-ħabta tas-sagħtejn u nofs ta’ waranofsinhar weġġa’ gravi lil-eks tfajla tiegħu fl-Imsida.
L-imputat ġie akkużat ukoll li insulenta u hedded lil din it-tfajla u li kiser il-paċi pubblika.
Id-Difiża mmexxija mill-Avukat tal-Għajnuna Legali Mario Caruana talbet għall-ħelsien mill-arrest, hekk kif intqal kif ir-raġel kien vittma, hekk kif fl-allegat argument, it-tfajla gidmet lill-imputat f’idejh. Intqal kif ir-raġel ilu jgħix hawn Malta għall-iżjed minn għaxar snin u li għandu post fejn jgħix f’San Pawl il-Baħar. Intqal ukoll kif huwa għandu fedina penali nadifa.
L-akkużat wieġeb mhux ħati għall-akkużi miġjuba kontrih u ma t-talba għal-libertà proviżorja ma ġietx milqugħa.
Il-Qorti mmexxija mill-Maġistrat Gabriella Vella appellat biex il-vittma titla’ tixhed fis-seduta li jmiss.
Il-Maġistrat Gabriella Vella tat ordni ta’ protezzjoni fil-konfront tal-vittma għal ħames snin.
