Kanadiż ta’ 62 sena qiegħed jinżamm arrestat b’rabta ma’ importazzjoni, traffikar u pussess aggravat ta’ droga kannabis.
Ir-raġel kien arrestat nhar il-Ġimgħa li għadda mill-Pulizija mill-Iskwadra ta’ Kontra d-Droga, wara li ġew infurmati mid-Dipartiment tad-Dwana illi kienu waslu tliet kaxxi li fihom kien hemm madwar tmintax-il elf sigarett b’sustanza illegali suspettata ħaxixa tal-kannabis.
Minn investigazzjonijiet tal-Pulizija rriżulta li s-sigaretti kienu indirizzati għal raġel li joqgħod is-Swieqi.
Minn aktar investigazzjonijiet li saru fid-dar tar-raġel nstabu aktar prodotti oħra magħmulin minn estratti tal-kannabis kif ukoll ammont ieħor ta’ sigaretti simili għal dawk illi waslu bil-posta.
B’rabta ma’ dan il-każ infetħet inkjesta mmexxija mill-Maġistrat tal-Għassa Dr Charmaine Galea.
Ir-raġel mistenni jitressaq il-Qorti għall-ħabta tal-10:00 ta’ dalgħodu, mixli akkużat b’importazzjoni, traffikar u pussess aggravat ta’ droga kannabis.
Il-Prosekuzzjoni se titmexxa mill-Ispetturi Alfredo Mangion u Justine Grech.
Ritratti: Uffiċċju tal-Komunikazzjoni, Il-Korp tal-Pulizija ta’ Malta
