Grupp ta’ tliet ħallelin, li serqu numru ta’ oġġetti u ġojjelli li l-valur jammonta ‘l fuq minn €30 miljun, intbgħatu bejn tmien snin u ħdax-il sena ħabs kull wieħed.
It-tliet Taljani; Jugoslav Jovanovic, Alessandro Maltese u Alessandro Donati ammettew li serqu numru ta’ oġġetti prezzjużi fi tliet serqiet.
Fost il-vittmi kien hemm l-eks kowċ ta’ Chelsea u eks footballer Ingliż Frank Lampard, kif ukoll bint l-eks Kap Eżekuttiv tal-Formula 1, Tamara Ecclestone.
Jovanovic ta’ 24 sena inbgħat disa’ snin ħabs akkużat b’konfoffa ta’ serq, kif ukoll sentejn oħra fuq ħasil ta’ flus.
Filwaqt li Donati ta’ 45 sena u Maltese ta’ 44 sena, it-tnejn ingħataw sentenza ta’ tmien snin u disa’ xhur ħabs wara li nstabu ħatja ta’ konfoffa ta’ serq.
Ħafna mill-ġojjelli u arloġġi ta’ valur misruqa qatt ma ġew irkuprati.
