“Diskors li jispiralek fiduċja.”
“L-aqwa diskors tal-Prim Ministru sa issa.”
Dawn kienu reazzjonijiet mid-diskors tal-Prim Ministru dwar il-Budget għas-sena d-dieħla fil-Parlament.
L-Opinjonista Politiku Desmond Zammit Marmarà stqarr kif id-diskors tal-Prim Ministru kien timbru ta’ Gvern Soċjalista li jieħu ħsieb liż-żgħir: “Laqatni ħafna d-diskors tiegħu, l-ewwel nett għaliex naħseb għamel ċertu ‘commitment’ fuq il-policy ta’ Gvern Laburista li hija li huwa dejjem ser jibqa’ jieħu ħsieb lil dak li huwa vulnerabbli fis-soċjetà.”
Zammit Marmarà stqarr kif bid-diskors tiegħu, il-Prim Ministru jispiralek fiduċja li b’mod realistiku u b’differenza għall-Kap tal-Oppożizzjoni Bernard Grech, għandu pjan biex joħroġ lil pajjiżna mill-proċedura ta’ aktar moniteraġġ tal-FATF.
Huwa sostna: “Serraħ moħħ kulħadd rigward il-kwistjoni tal-Greylisting tal-FATF. B’mod però realistiku mhux kif jgħid il-kap tal-oppożizzjoni, dak li kien għalih fi ftit xhur kollox ikun ok. Xi ħaġa li mhux realistika.”
Fuq programm fuq l-istazzjon nazzjonali, ikkummenta wkoll il-ġurnalist t’esperjenza Saviour Balzan: “Id-diskors tal-Prim Ministru fl-opinjoni tiegħi kien, kemm ili issa, naħseb aħna ffissati nħarsu lejn x’qed jgħidu l-politiċi, naħseb kien l-aħjar diskors li qatt ta.”
Hawnhekk Balzan għamel paragun bejn il-Prim Ministru u l-Kap tal-Oppożizzjoni: “Jien qatt ma kont nistenna li Robert Abela jkollu ‘understanding’ kif jgħid l-ingliż tan-numri imma wera li għandu understanding tan-numri. Imma Bernard Grech jikxef li ma jifhimx fin-numri u din hija importanti ħafna fil-politika.”
ONE News tkellem ukoll mal-Analista Finanzjarju Roderick Psaila, li spjega kif filwaqt li l-Budget jawgura tajjeb sabiex in-negozji Maltin ikunu fl-aħjar pożizzjoni li jikkapitalizzaw mill-irkupru wara l-pandemija, id-diskors tal-Prim Ministru kien wieħed li jtik ċertezza għall-ġejjieni sabiħ għall-ekonomija Maltija.
Psaila stqarr: “Naħseb il-Prim Ministru kompla jagħti ċertezza lill-businesses illi ħa jibqa hemm, mhu ser iħalli lil ħadd warajh u li f’din il-fażi biex nerġgħu mmorru lura għall-ekonomija li kellna qabel il-pandemija, din l-għajnuna hija mhux bżonjuża imma vitali.”
