Wara li l-investigazzjonijiet tal-Pulizija kkonkludew li l-allegazzjonijiet ta’ Jason Azzopardi dwar iżjed minn 18,000 ID Card falsifikati fl-aġenzija Identità ma kienu xejn iżjed minn invenzjoni grassa, il-Kap tal-Oppożizzjoni Bernard Grech ma riedx jammetti li kien bela’ din il-gidba u għamilha tiegħu, tant li rrepetiha diversi drabi fil-pubbliku.
Minkejja dan, iffaċċjat anke bir-recording ta’ dak li qal hu stess l-għada li, fil-Qorti, ġie stabbilit li nstabu biss seba’ karti tal-identità falsifikati f’kawża ġudizzjarja fejn qed jiġu akkużati żewġ persuni, Grech għażel li jinjora lil ONE News.
Ġurnalist: “Il-lejla t-tajba Onorevoli, jimporta nsemmagħlek filmat?”
Bernard Grech: “Insellimlek, kif int, kollox sew?”
Ġurnalist: “Jiddispjaċik li għedt gidba …”
Bernard Grech: “Konferma li kien hemm l-ID Cards foloz.”
ONE News ipprova jsemmagħlu d-dikjarazzjoni tiegħu stess li għamel f’attività tal-Partit Nazzjonalista, ibbażata fuq il-gidba tal-Avukat tal-għaqda Repubblika u dak stess li poġġih fil-kariga.
“Tmintax-il elf karta tal-identità foloz.”
Bernad Grechm Kap tal-Oppożizzjoni
Iżda anke, waqt li ONE News stennih barra l-Parlament u reġa’ pprova jieħu r-reazzjoni tiegħu fuq dak li ħareġ mill-Qorti, Grech reġa’ njora lill-ġurnalist tagħna, kif issa ħadha d-drawwa, u lanqas ittanta jiġġustifika l-gidba li bellagħlu Azzopardi.
U dlonk rikeb fil-karozza tiegħu biex jevita wkoll l-imbarazzament tas-sitwazzjoni li reġa’ spiċċa fiha.
“Inti ma semmajtlix filmat, semmajtli kelma.”
Bernad Grechm Kap tal-Oppożizzjoni
Sadanittant anke l-perċimes tal-establishment Nazzjonalista issa wkoll qed jipprova jċekken jew saħansitra jevita l-fatt li reġa’ nqabad jigdeb sfaċċatament, sempliċiment biex jipprova jagħmel ħsara lill-pajjiż u lill-Gvern Laburista.
U dan waqt li reġa’ daħħal lill-Kap u l-Partit Nazzjonalista fi sqaq ieħor li ma jinfidx.
Iżda Azzopardi rrepeta d-dikjarazzjoni falza tiegħu kemm-il darba fl-aħħar xhur, inkluż f’din l-intervista mal-Lovin’ Malta.
“L-implikazzjonijiet huma kbar ħafna … imma hawn qed nitkellmu fuq eluf ta’ nies, eluf kbar ta’ nies li rċevew u ngħataw minn Identity Malta …”.
Jason Azzopardi, Avukat ta’ Repubblika
