Il-konservazzjoni tal-ambjent naturali Malti u l-preservazzjoni tal-bijodiversità huma l-ikbar żewġ pilastri fl-ekosistema ta’ pajjiżna.
Dawn il-pilastri qed jiġu mħaddna fi proġett li beda dan l-aħħar bil-għan li jiżdied in-numru tal-ispeċi tal-barbaġann f’Malta. Proġett li qed ikompli jħalli l-frott hekk kif fir-Razzett tal-Bagħal fil-Buskett, li huwa mmexxi mill-Federazzjoni Kaċċaturi Nassaba Konservazzjonisti, is-Sibt filgħodu nħelsu tmint ifrieħ oħra tal-barbaġann, li tnejn minnhom saħansitra se jkunu mgħammra b’GPS żgħir biex jinżamm rendikont ta’ fejn ikun fis-selvaġġ.
II-President tal-Federazzjoni Kaċċaturi Nassaba Konservazzjonisti FKNK, Lucas Micallef tkellem ma’ ONE News dwar l-importanza li l-ambjent Malti jkompli jkun imħares u kif flimkien għandna naħdmu għal aktar konservazzjoni tal-ambjent naturali ta’ pajjiżna u kif ukoll tal-bijodiversità.
Tlabnih il-kumment tiegħu dwar dan it-tragward importanti f’dan il-proġett.
Micallef spjega, “Illum propju tlaqna l-aħħar frieħ tal-barbaġġan mill-proġett tal-introduzzjoni mill-ġdid tal-barbaġann fis-selvaġġ. Qegħdin il-Buskett, s-sena l-oħra wkoll tlaqna numru ta’ barbaġanni, fejn għadhom jiffrekwentaw dan il-post, għax nimmoniterjawhom waqt l-iljieli. Biss illum se nitilqu għall-ewwel darba ħa nitilqu xi barbaġanni li se jkollhom apparat eletroniku, fejn ħa nkunu nistgħu nattraċċaw u nifhmu aktar l-atteġġjament tagħhom matul il-lejl fil-madwar, biex b’hekk inkunu nafu fejn qed jistrieħu, fejn qed jieklu u nisperaw li fil-jiem li ġejjin ikunu jistgħu jkattru fis-selvaġġ.”
Is-Sur Micallef qalilna li l-FKNK bħalissa qed taħdem fuq diversi proġett ta’ konservazzjoni li qed taħdem fuqu din l-għaqda.
Hu qal, “Għandna proġett ieħor sabiħ ta’ mixtla fejn qed inkabbru diversi siġar u arbuxelli indiġeni Maltin fejn qed inqassmu lill-pubbliku u lill-membri, fejn sa issa qassamna madwar 8,000 siġra u arbuxella, kif ukoll għandna proġett interessanti fejn inkaabbru l-ġamiem fil-magħluq, innissluh u nitilquh fis-selvaġġ.”
