Bil-għan li tissaħħaħ il-ħidma fost il-fergħat tal-Bank of Valletta u jittejjeb is-servizz offrut lill-klijenti, il-Bank ħatar seba’ impjegati sabiex jokkupaw karigi ġodda fit-tmexxija ta’ diversi fergħat madwar Malta.
Il-Maniġers il-ġodda kienu milqugħa mill-Kap Eżekuttiv tal-BOV, is-Sur Kenneth Farrugia, u mill-Kap fit-taqsima tar-Retail Network fi ħdan il-BOV, is-Sur Geoffrey Ghigo, ftit jiem biss wara li l-ħatra saret uffiċjali. Il-mexxejja l-ġodda kienu diġà jiffurmaw parti mill-istaff tal-fergħat, u l-ħatra tagħhom hija l-frott ta’ snin twal ta’ ħidma sfieqa u impenn lejn il-Bank.
Is-Sur Farrugia nnota b’sodisfazzjon li l-ħatriet il-ġodda, se jsaħħu s-servizz offrut mill-fergħat tal-Bank għall-benefiċċju tal-klijenti, waqt li fakkar li l-Bank jimxi fuq prinċipji ta’ rikonoxximent u jemmen fl-avvanz fil-karriera tal-impjegati. Is-Sur Farrugia qal li “Ninsab ċert li l-ħatra tal-maniġers il-ġodda, se jkollha impatt pożittiv fuq l-impjegati li se jkunu qed jirrapportaw lilhom, kif ukoll fuq il-klijenti tal-istess fergħat li qed imexxu. Kif diġa’ sħaqt f’diversi laqgħat li kelli mal-istaff fix-xhur li għaddew, il-Bank se jkompli jinvesti fil-ħiliet u l-iżvilupp tan-nies tagħna sabiex insostnu l-aspirazzjonijiet fil-karriera, l-ambizzjonijiet u l-avvanz”. B’dan il-mod kompla s-Sur Farrugia, il-Bank ikun qed jiżgura li l-klijenti tiegħu jingħataw servizz professjonali, mill-esperjenza vasta tal-impjegati li kontinwament jingħataw taħriġ apposta bl-għan aħħari jibqa’ dak li l-BOV isir il-Post tax-Xogħol tal-Għażla għal min qed ifittex impjieg fis-settur finanzjarju u jsir il-Bank tal-Għażla għall-klijenti.
Is-Sur Geoffrey Ghigo qal li “dawn il-ħatriet ġodda, se jsaħħu l-preżenza tal-BOV fil-komunitajiet lokali, peress li l-Maniġers tal-Fergħat se jkunu qed jiffukaw fuq il-bżonnijiet tal-klijenti fil-lokalità li jservu. Il-mexxejja tal-fergħat huma fdati b’responsabbiltà li jieħdu l-aħjar deċiżjonijiet fl-interess tal-klijenti waqt li joħolqu ambjent mill-aqwa biex is-servizz ikun estiż lejn il-ħtiġijiet tal-komunità.”
Il-maniġers il-ġodda huma: Dennis Bonnici – Fgura, Josephine Scicluna – Ibraġ, Georgina Portelli – Ħal-Luqa u SkyParks, Joanne Cutajar – il-Mellieħa, Anna Maria Rossi – l-Imsida, Audrey Azzopardi – Ħaż-Żebbuġ u Elaine Farrugia – Buġibba
