B’investiment ta’ aktar minn disgħin elf ewro, kumpanija tal-karozzi ġabet l-ewwel vann lussuż tat-tip Mercedes Benz E-Vito, li jaħdem bl-elettriku.
Dan huwa l-ewwel wieħed tax-xorta tiegħu f’Malta.
Il-Ministru għall-Ambjent, Aaron Farrugia, li kien preżenti għall-preżentazzjoni ta’ dan il-vann qal li din l-inizjattiva hija eżempju ċar ta’ kif is-settur privat jista’ jgħin sabiex jkollna arja iżjed nadifa.
Stqarr li t-trasport iħalli impatt fuq il-livelli tal-emissjonijiet fl-arja u tenna li l-Gvern diġà qed jagħti l-inċentivi u se jkompli jsaħħaħ dawn l-istess inċentivi.
Qal li huwa importanti li l-istrateġija ta’ karbonju baxx tmexxina lejn il-mira li nkunu ħielsa mill-karbonju.
Il-Ministru Farrugia saħaq li b’investiment fl-infrastruttura u b’sistema ta’ tranżitu tal-massa aħjar jistgħu jitnaqqsu l-emmissjonijiet.
Il-Ministru Farrugia tenna li ma’ din il-kumpanija, hu ddiskuta bosta affarjiet fosthom kif pajjiżna għandu jagħmel din it-tranżizzjoni ambjentali sabiex innaqsu l-effetti li qed iħalli t-tibdil fil-klima.
“Magħhom iddiskutejt diversi affarjiet fosthom l-inċentivi li l-gvern qiegħed jagħti preżentament u x’inċentivi għandu jagħti fi żmien illi ġej imma wkoll skadenzi. Ilkoll nagħfu li diversi pajjiżi għamlu projbizzjoni fuq l-importazzjoni ta’ internal combustion engines fosthom in-Norvegja fl-elfejn u ħamsa u għoxrin u r-Renju Unit fl-elfjen u tletin u allura magħhom iddiskutejt l-pajjiż tagħna kif għandu jimxi lejn din it-tranżizzjoni ekoloġika.”
Żied jgħid ukoll li jħares ‘il quddiem sabiex f’Novembru li ġej jattendi laqgħa fuq it-tibdil fil-klima fejn se jkun spjegat l-pjan ambizzjuz ta’ pajjiżna fuq livell Ewropew.
Minn naħa tiegħu, id-Direttur Maniġerjali tal-kumpanija, Darren Zarb, stqarr li waħda mill-aktar prijoritajiet tal-kumpanija hija li tkun tassew ħabiba tal-ambjent u dan l-investiment huwa eżempju ħaj tal-isforzi li qegħdin isiru.
