Hubert Gatt ta’ 32 sena mill-Gżira, Tyson Grech ta’ 25 sena mill-Isla u Jeremy Borg ta’ 19-il sena li m’għandux indirizz fiss, ingħataw il-ħelsien mill-arrest wara li tressqu l-Qorti akkużati bi traffikar tad-droga.
Il-Prosekuzzjoni qalet li taħseb li l-irġiel instabu fil-pussess ta’ 11-il gramma droga kokaina, filwaqt li Grech u Borg ġew mixlija wkoll li kissru l-ordnijiet tal-Qorti imposti fuqhom f’każijiet preċedenti.
Huma wieġbu mhux ħatja tal-akkużi miġjuba kontrihom u talbu għall-ħelsien mill-arrest.
Il-Qorti pperseduta mill-Maġistrat Joe Mifsud laqgħet din it-talba fuq depożitu ta’ €500 u garanzija personali ta’ €4,500.
