Bl-edizzjoni li jmiss tal-Logħob tal-Pajjiżi ż-Żgħar issir bejn l-aħħar ta’ dan ix-xahar u l-bidu ta’ Ġunju f’Andorra, tħabbru d-dettalji dwar il-kontinġent li se jkun qed jirrappreżenta lil Malta.
Fl-edizzjoni ta’ sentejn ilu, li kienet saret proprju f’pajjiżna, Malta rebħet il-kompetizzjoni b’total ta’ 97 midalja, fosthom 38 tad-deheb.
Waqt din it-tnedija l-Ħamis filgħodu, il-Kumitat Olimpiku Malti ħabbar il-kontinġent li se jirrappreżentana f’din l-20 edizzjoni tal-Logħob f’Andorra fl-2025, fost aktar minn 800 atleta minn disa’ pajjiżi Ewropej. Minbarra Malta, jinkludu wkoll lill-istess Andorra, Ċipru, l-Iżlanda, il-Leichtenstein, il-Lussemburgu, Monaco, il-Montenegro u San Marino.
Tim Malta se jkun qed jikkompeti f’firxa wiesgħa ta’ dixxiplini sportivi fosthom l-atletika, l-għawm artistiku, basketball 3×3, ċikliżmu, ġinnastika artistika u ritmika, karate, rugby, sparar, għawm, table tennis u tennis.
Charlene Attard, Direttriċi fi ħdan il-Kumitat Olimpiku Malti, spjegat il-proċess tal-għażla tat-tim fejn irrimarkat li ġew stabbiliti standards minimi ta’ kwalifika apposta, b’kollaborazzjoni mal-federazzjonijiet sportivi rispettivi.
Qalet li dawn l-istandards jiżguraw li kull atleta magħżul ikun laħaq livell ta’ prestazzjoni mixtieqa, bil-għan li jkun hemm tim b’saħħtu u kompetittiv fid-dixxiplini kollha rappreżentanti.
Attard spjegat li fit-tim għal din is-sena hemm taħlita ta’ atleti, li għandhom esperjenza fl-istess logħob kif ukoll kompetizzjonijiet internazzjonali, flimkien ma’ numru ta’ parteċipanti ġodda li kkwalifikaw fuq il-mertu tagħhom.
“Bħala pajjiż, jagħżel l-isports li se jagħmel, fejn jagħżel dak li jaqbel lilu u aħna, bħala pajjiż li se nieħdu sehem, nagħmlu l-kriterji tagħna u minn hemm nagħżlu t-tim. Filfatt, it-tim se jkun magħmul minn 108 atleti, 53 uffiċjal, coaches u medical, fejn Malta se tieħu erba’ uffiċjali f’erba’ dixxiplini differenti, li se jkunu parti mill-judges team tal-logħob.”
CHARLENE ATTARD
Tkellem ukoll ix-Chef de Mission, Daniel Farrugia Tanti, li qal li l-atleti u l-uffiċjali kollha Maltin se jkunu akkomodati f’lukanda ċentrali, waqt, li biex tiġi ffaċilitata l-kordinazzjoni u jinbena l-ispirtu tat-tim, ġiet riservata titjira charter, li tinkludi postijiet limitati għall-qraba u ħbieb li jixtiequ jappoġġjaw lil Tim Malta f’Andorra.
Il-President tal-Kumitat Olimpiku Malti, Julian Pace Bonello, ħabbar li l-atleti li se jġorru l-bandiera Maltija fiċ-ċerimonja tal-ftuħ se jkunu t-tennista Francesca Curmi u l-atleta Jared Micallef, li ddeskrivihom bħala eżempju ċar ta’ dedikazzjoni, konsistenza u eċċellenza sportiva.
Jethro Zammit Randich u Kyle Gauci mit-team tar-Rugby 7s, kif ukoll Zea Montfort, li se tieħu sehem fl-għawm artistiku, spjegawlna t-tħejjijiet li qed isiru kif ukoll l-esperjenza tagħhom.
“Preparations are mentally preparing for the competition, physically, training hard, doing the routine may times over and over, so you get the endurance and stamina, and for the competition you will be ready and know to expect.”
ZEA MONTFORT
“Ilna nippreparaw din l-aħħar sena, bi preparamenti għal-Logħob tal-Pajjiżi ż-Żgħar li jmiss, u hekk fadlilna l-aħħar żewġ tournaments biex il-kowċ nazzjonali jkun jista’ jagħmel l-aħħar għażla tiegħu għal-logħob li jmiss.”
JETHRO ZAMMIT RANDICH
“L-għan tagħna hu li nieħdu d-deheb, għandna żewġ tournaments u, b’hekk, il-kowċ se jaqta’ l-lista minn sittax għal tnax.”
KYLE GAUCI
