Raġel ingħata l-ħelsien mill-arrest b’diversi kundizzjonijiet wara li wieġeb li mhux ħati ta’ akkużi li jinkludu l-pussess u t-traffikar ta’ droga.
Nishit Rakeshkumar Bhatt tressaq il-Qorti dalgħodu, quddiem il-Maġistrat Gabriella Vella.
L-ispettur Clayton Camilleri, f’isem il-Prosekuzzjoni, spjega kif kmieni l-Ħadd,fit-3.30am, fi stabbiliment tad-divertiment fl-inħawi ta’ bejn Ħaż Żebbuġ u r-Rabat, il-bouncers fuq il-post raw lill-imputat allegatament ibigħ jew jikkonsma d-droga.
Wara li ġew ikkuntattjati l-Pulizija u fittxew lir-raġel fuq il-post, instabulu sustanza f’forma ta’ pirmli b’kulur blu u anke sustanza f’forma ta’ trab abjad. Kellu wkoll €450 flus kontanti. L-Ispettur spjega li lill-akkużat inqrawlu d-drittijiet tiegħu u b’hekk ġie arrestat.
Sussegwentament, anke saret tfittxija fir-residenza tiegħu, fejn instabet aktar sustanza li huwa suspettat li hija droga, flimkien ma’ oġġetti fosthom imwieżen, li juru li din setgħet kienet qed tintuża għat-traffikar.
L-Ispettur Camilleri qal li l-imputat ammetta li din id-droga kienet tiegħu u anke kkopera mal-pulizija. Instabu wkoll €1,400 flus kontanti fil-friex ta’ soddtu.
Meta l-Qorti ġiet biex titratta t-talba għall-ħelsien mill-arrest, il-Prosekuzzjoni spjegat li, apparti li l-imputat mal-Pulizija ammetta li d-droga u l-oġġetti kienu tiegħu, għad hemm xhieda li jridu jixhdu.
Min-naħa tagħha d-difiża sostniet li l-imputat għadu qed jistudja u kkopera f’kull stadju tal-investigazzjonijiet mal-Pulizija.
Il-Qorti laqgħet it-talba għall ħelsien mill-arrest b’diversi kundizzjonijiet, fosthom li ma jistax isiefer jew jinħeba, li jidher għal kull seduta fil-Qorti b’rabta mal-każ, li ma jistax ikellem b’mod dirett jew indirett lix-xhieda tal-Prosekuzzjoni, li ma jikkommettix reat ieħor b’mod volontarju, li jrid jirrapporta l-għassa ta’ Birkirkara kuljum bejn is-7am u s-7pm, u li jinġabar f’daru mhux aktar tard mill-10.30pm.
It-talba għall-ħelsien mill-arrest ngħatat ukoll fuq depożitu ta’ €1,000 u garanzija personali ta’ €9,000.
L-imputat ġie assistit minn Dr Noel Bianco.
