L-Erbgħa filgħaxija ġie konkluż it-Tieni Qari dwar l-emendi fil-liġi tal-IVF, li għandhom l-għan li aktar nies isiru ġenituri.
Fl-għeluq tad-dibattitu dwar il-liġi tal-IVF, id-Deputat Prim Ministru u Ministru għas-Saħħa Chris Fearne qal li l-IVF toffri tama u soluzzjoni medika lill-persuni li jkollhom problema ta’ infertilità.
Chris Fearne spjega l-punti ewlenin fil-protokoll marbut mal-liġi mressqa tal-IVF, li se jżidu l-possibilità li jkollna aktar ħajjiet, dejjem mingħajr ħlas.
Huwa ċċara l-fatt li l-embrijuni li hemm iffiriżati se jiġu kollha implantati.
Qal li “kellna 461 embrijuni li kienu ffriżati u ġew implantati u għandna numru ta’ embrijuni li huma friżati, illi kollha hemm il-pjan li dawn jiġu implantati, għax inti meta tagħmel l-IVF, ma tagħmlux b’kapriċċ. Meta tagħmel l-IVF u tgħaddi minn din il-proċedura kollha, l-embrijuni li jkollok iffriżati tkun tridhom, u allura, iva, l-embrijuni li għandna ffriżati kollha qegħdin ipprogrammati li jiġu implantati.”
Id-Deputat Prim Ministru, anke wara li innota nuqqas ta’ kredibbilità mill-Oppożizzjoni, saħaq kif Malta għandha u se jkollha r-riżorsi meħtieġa sabiex jitħaddmu l-emendi fil-liġi tal-IVF.
“Malta għadna l-poċeduri, għandna n-nies kapaċi, għandna l-ispeċjalisti kapaċi u jekk tgħaddi din il-liġi narmaw il-laboratorji tagħna biex fi ftit xhur inkunu nistgħu nagħmluha Malta. Għalfejn barra iva u Malta le? Għalfejn? Għalfejn din il-moħqrija? Jien ngħidlek għax jitkellmu ħafna fuq hux morali u mhux morali, jien ngħid mhux morali li għandek l-għodda xjentifika biex tevita dawn l-istejjer u ma tużahomx. Dik mhux morali” tenna d-Deputat Prim Ministru.
Il-Ministru għas-Saħħa temm billi appella sabiex kull deputat jivvota favur din il-liġi importanti ferm u li tfisser ħafna għal bosta.
