Fit‑35 siegħa tal‑Maratona tal‑Volleyball nġabret is‑somma ta’ €366,817.
Fr Martin Micallef, li huwa d-Direttur tad‑Dar tal‑Providenza, irringrazzja lill‑poplu Malti u Għawdxi, li għal darba oħra wieġeb b’tant ġenerożità għas‑sejħa li saret biex jinġabru l‑fondi għad‑Dar, permezz ta’ din il-maratona. Huwa rringrazzja wkoll lill‑players, lill‑volontiera, lill‑membri tal‑kumitat organizzattiv, l‑isponsors kollha, l‑istazzjonijet ewlenin tat‑televixin li xandru din il‑maratona, kantanti u bands, lill‑pulizija u lil dawk kollha li b’xi mod jew ieħor għenu biex din il‑Maratona tkun suċċess.
Erbgħin player, li ffurmaw ħames timijiet, baqgħu jilagħbu mingħajr waqfien mis‑sitta ta’ filgħaxija tal‑Ġimgħa.
Waqt l-istess attività, grupp ta’ atleti Sloveni, uħud minnhom persuni b’diżabilità, ħadu sehem fil‑logħob ta’ sitting volleyball li sar għall‑ewwel darba fid‑Dar tas‑Siġġiewi. Din l‑attività saret bis‑saħħa ta’ ParaVolley Malta u l‑Birkirkara Volley Club. Saret enfasi li attivitajiet bħal dawn jippromwovu l‑fatt li l‑isport huwa għal kulħadd, hu x’inhu l‑livell tal‑abbiltà personali.
Minbarra l‑erbgħin player li kienu l‑protagonisti ewlenin ta’ din il‑Maratona, kien hemm ukoll madwar mitejn voluntier. Kull filgħaxija kien hemm spettaklu mużikali fuq il‑palk prinċipali, ikel u xorb u logħob għat‑tfal. Il‑Maratona ingħatat f’xandiriet diretti fuq l‑istazzjonijiet tat‑televixin ewlenin f’pajjiżna.
