Aktar kmieni dan ix-xahar sebgħa u għoxrin voluntier temmew b’suċċess il-mixja ta’ Camino de Santiago organizzata mill-Fondazzjoni Sigma fejn inġabret is-somma rekord ta’ €135,000, liema fondi se jkunu qed jaraw il-bini ta’ grawnd tal-logħob li se jkun qed jagħmel parti minn kumpless ta’ skola għal seba’ mitt student f’Bonga fl-Etjopja.
Huma telqu minn Sarria biex jimxu mija u għoxrin kilometru u jaslu lejn il-Katidral ta’ Santiago de Compostela.
L-emozzjonijiet f’din il-mixja kienu kbar però hija xi ħaġa li tħalli l-frott tagħha u ma’ dan tkellimna mal-Kap għall-Filantropja tal-Fondazzjoni Sigma, Keith Marshall fejn irrimarka li hija xi ħaġa fenomenali li tara grupp ta’ nies li ftit żmien ilu ma kienux jafu lil xulxin u issa qed jingħaqdu flimkien b’dan il-mod biex jgħinu nies li huma inqas ixxurtjati minnha.
Marshall qal, “F’dawn is-stt xhur naħseb preparajna rwieħna tajjeb jiġifieri iffurmajna tim, it-training mar kif xieraq u anka fir-rigward tal-ġbir tal-fondi għal min hu inqas ixxurtjat minna ilħaqna l-għan tagħna u naħseb jekk inti tqis fund raising, challenge għax vera challenge 120km f’ħames t’ijiem u fl-istess ħin kollu taħt il-kappa tal-filantropija naħseb l-equation hija xierqa.”
Keith qal li l-preparamenti għal din il-mixja huma diffiċli iżda jekk issib lil xi ħadd jimmotivak biex tittrenja u tagħmel ħiltek, hija esperjenza li ttik sodisfazzjon kbir.
Huwa stqarr, “Fl-aħħar mill-aħħar jekk qalb 27 ruħ issib klikka ma’ min timxi jiġifieri ġurnata waħda jimxu sitta, l-għada jimxu għaxra oħra, jiġifieri l-aqwa li tiklokkja dawk il-kilometri fil-ġimgħa.”
Il-Fondazzjoni Sigma beħsiebha torganizza mixja oħra f’Settembru u Marshall qal li jekk xi ħadd ikun interessat li jiġu sehem f’din il-mixja mistika jista’ jikkunttattja lilu personalment jew il-paġna ta’ Facebook tal-Fondazzjoni Sigma.
Hawn qal, “Bħalissa għandna preparamenti għaddejjin, għaqqadna grupp ta’ tletin, jitilqu minn xtutna fl-ewwel ta’ Settembru sat-tmienja ta’ Settembru, jiġifieri grupp sostanzjali ħafna biex nerġgħu nagħmlu l-Camino De Santiago Spanish edition.”
