Il-ħbieb u qraba ta’ Giacomo Cassar Fenech, li għandu disa’ snin u bħalissa qed jiġġieled kontra l-kanċer, ser ikunu qed jieħdu sehem fl-attività Global Run Valletta (GRV) 2016 billi jingħaqdu mal-atleti nhar il-Ħadd 30 ta’ Ottubru.
Dawk li ser jieħdu sehem fil-‘Walk for Giacomo’ ser ikunu qed jilbsu flokkijiet bil-kuluri oranġjo, aħmar, isfar u blu – ispirati mill-kuluri tal-qawsalla. Il-grupp ser ikun qed iwassal ix-xewqat ta’ Giacomo biex jinkoraġġixxu lin-nies jagħtu d-demm kif ukoll donazzjonijiet lill-Puttinu Cares.
“Meta sirna nafu dwar din il-maratona, iddeċidejna li ningħaqdu mal-organizzaturi bl-għan li l-flus li jinġabru mir-reġistrazzjoni jmorru kollha għal Puttinu Cares. Ix-xewqa ta’ Giacomo, hi li n-nies jagħtu l-appoġġ tagħhom lil din l-organizazzjoni ta’ karitá li qed tgħin ħafna fil-ġlieda kontra l-kanċer,” stqarret Jackie Cooper, li t-tifel tagħha u Giacomo huma ħbieb kbar.
Skont Cooper, l-idea wara din il-mixja hi li jieħdu xi ħaġa lura lil Giacomo biex iħossu involut minkejja l-fatt li ilhu fis-sodda għal dawn l-aħħar sitt ġimgħat.
Iktar minn 175 persuna, fosthom tfal l-età ta’ Giacomo, diġa’ rreġistraw l-interess tagħhom biex jipparteċipaw.
“L-entużjażmu tal-parteċipanti hu tassew ta’ ispirazzjoni għal Puttinu Cares. Dawn it-tfal qed jagħtu eżempju billi juru li s-solidarjetà u li ħbiberija vera m’għandiex età. Nilqgħu b’ferħ inizjattivi bħal dawn,” qal kelliem għal Puttinu Cares.
GRV 2016, li ser issir il-Ħadd 30 ta’ Ottubru, hi organizzata minn Global Ports Holding, ser tinkludi ġirja ta’ 10 kilometri u mixja u ġirja ta’ 5 kilometri. Il-miżati tar-reġistrazzjonijiet ser jingħataw kollha għal Puttinu Cares.
Reġistrazzjonijiet kemm għat-tellieqa kif ukoll għall-mixja huma diġa’ miftuħa għall-persuni li twieldu sal-2011. Dawk il-persuni li qed jirreġistraw għal Giacomo għandhom jiktbu ‘Giacomo’ fil-kaxxa fejn jintalbu biex jindikaw il-klabb. Il-miżata tal-parteċipazzjoni hi ta’ €10 għall-ġirja, u €5 għall-ġirja ta’ 5K u €5 għall-mixja ta’ 5K. Ir-reġistrazzjoni tista’ ssir onlajn fuq www.globalrunvalletta.com. L-avveniment jista’ jkun segwit fuq facebook.com/globalrunseries u instagram.com/globalrunseries
