Investiment ieħor fil-Protezzjoni Ċivili issarraf fi stazzjon tat-tifi tan-nar fix-Xemxija rinovat, aktar modern u attrezzat bl-aħjar mod mhux biss għal servizz aqwa lill-familji Maltin u Għawdxin iżda wkoll ambjent xieraq għall-ħaddiema.
B’dan l-istazzjon, li ilu miftuħ u jopera mis-snin disgħin qatt ma kien ġie rinovat u għalhekk b’dan il-proġett b’investiment li jiżboq il-€1.2 miljun, l-istazzjon li hu użat erbgħa u għoxrin siegħa kuljum is-sena kollha, qiegħed joffri faċilitajiet akbar u aħjar. Parti mix-xogħol ta’ modernizzar inkluda t-titjib fil-garaxxijiet biex jakkomodaw aħjar l-inġenji u vetturi ġodda tad-dipartiment.
L-istazzjon numru 3, issa joffri wkoll is-servizzi meħtieġa biex pumpier mar-ritorn tiegħu minn inċident jagħmel il-process ta’ dekontaminazzjoni, u li għalhekk dan l-investiment ifisser ukoll kundizzjonijiet aqwa għall-ħaddiema.
Waqt żjara fuq il-post il-Ministru għall-Intern, is-Sigurtà u x-Xogħol Byron Camilleri qal li l-investiment kontinwu fid-drittijiet u kundizzjonijiet tal-ħaddiema hu kkumplimentat minn investiment bħal dan fl-infrastruttura u fl-għodda li jużaw, li qed isir sabiex il-pajjiż jibqa’ jkun ippreparat għal dak kollu li jista’ jinqala.
Il-Ministru rrefera għal dan l-investiment bħala xhieda tal-bidla li qed iwettaq dan il-Gvern fil-Korpi Dixxiplinati kollha, filwaqt li ta eżempji ta’ investimenti oħra li saru f’dan id-Dipartiment, fosthom dak ta’ ilbies protettiv ġdid li għadu kif ingħata lill-ħaddiema tal-Protezzjoni Ċivili, fire suits u immersion suits, aktar sikuri għall-ħaddiema u 35 fil-mija eħfef.
Elenka wkoll it-tisħiħ tal-infrastruttura tal-protezzjoni ċivili fosthom l-estensjoni tal-istazzjon marittimu filwaqt li għaddej ix-xogħol għal stazzjon ġdid fil-Furjana u ieħor f’Baħar iċ-Ċagħaq. Id-dipartiment se jżid aktar il-vetturi speċjalizzati biex jikkontrollaw nirien industrijali, domestiċi u dawk HAZMAT. Filwaqt li ħloqna infrastruttura madwar il-pajjiż biex f’każ ta’ emerġenza, il-pumpiera ma jmorrux lura l-istazzjon iżda jkollhom punt minn fejn jieħdu l-ilma viċin tagħhom. Wasal ukoll fil-fażijiet finali, il-proġett ta’ 40 sistema ta’ CCTV fuq il-vetturi tat-tifi tan-nar. B’hekk il-kamra tal-kontroll u uffiċjali tad-Dipartiment se jkollhom viżjoni fuq l-inċident u jkunu jistgħu jiddeċiedu aħjar fuq l-għajnuna neċessarja.
Dwar il-kundizzjonijiet tal-ħaddiema, il-Ministru spjega wkoll li l-Gvern qed jinnegozja mal-unjins tal-ħaddiema ftehim settorali ġdid għad-Dipartiment tal-Protezzjoni Ċivili. Dan wara li kien dan il-Gvern li għaraf is-servizz ta’ dan id-dipartiment bħala korp dixxiplinat u tahom 25 sena servizz. Għall-ewwel darba tahom id-dritt li jitħallsu tas-sigħat kollha li jaħdmu, allowances u inċentivi għal progress fil-karriera kif ukoll aktar opportunitajiet ta’ taħriġ. Riflessjoni ta’ dan huwa wkoll in-numru ta’ persuni li qed tattira din il-karriera, bi ftit aktar minn 130 ħaddiem tnax-il sena ilu, dan id-dipartiment issaħħaħ għal 375 ħaddiem.
Il-ministru kkonkluda li n-nefqa maħsuba fil-budget għal Protezzjoni Ċivili turi l-prijorità tal-Gvern li jkompli jsostni l-investiment materjali u tar-riżors uman f’dan id-dipartiment u daqstant ieħor f’ħajja aktar sigura għall-familji.
Min-naħa tiegħu d-Direttur Ġeneral tad-Dipartiment tal-Protezzjoni Ċivili Peter Paul Coleiro qal li l-għan tad-Dipartiment tal-Protezzjoni Ċivili f’dak kollu li jwettaq hu li jagħti l-aqwa servizz lill-poplu Malti u Għawdxi u li investiment mistenni bħal dan, li bidel l-istazzjon numru 3 fix-Xemxija, ser jissarraf proprju f’dan. Elenka iżda wkoll l-importanza li l-ħaddiema tad-Dipartiment jaħdmu f’ambjent adegwat, u spjega d-differenza li dan jagħmel fil-ħajja tal-pumpiera. Ikkonkluda li dan kollu flimkien ma’ kundizzjonijiet aqwa, ifisser ukoll li aktar persuni jagħżlu li jservu lil Malta f’din il-karriera u li dan jawgura tajjeb għall-pajjiż.
