Jibqgħu biss it-tifkiriet. Tispiċċa titkellem u tiddiskuti miegħu ma’ ritratt tiegħu. Kultant titolbu jgħinek b’xi parir. It-tweġibiet tistħajlek tismagħhom biss f’moħħok. Biss leħnu xorta, għalkemm mill-bogħod, jibqa’ jidwi f’widnejk.
Din tista’ tkun ir-reazzjoni ta’ dawk li tilfu l-ġenituri tagħhom u għadhom iħossu n-nuqqas tagħhom, partikolarment f’okkażjonijiet bħalma hu Jum il-Missier, li nfakkru kull tielet Ħadd ta’ Ġunju.
Il-ġurnata, li tfakkar il-ħidma u l-istinkar tal-persuna biex jara li wliedu, f’kull ħin, ikunu kuntenti. Il-persuna li jagħmel minn kollox biex f’ħajjet it-tfal tiegħu, ikun dejjem hemm.
Jum il-Missier imur lura sas-sena 1908 meta f’inċident, li kien seħħ fil-minjieri fl-Istati Uniti, 361 raġel tilfu ħajjithom, b’250 minnhom ikunu missirijiet, li ħallew mal-elf wild jibku t-telfa tagħhom.
Għal xi snin kienet issir tifkira, imma ftit ta’żmien wara, twieldet din il-ġurnata, biex tfakkar is-sagrifiċċji ta’ dawk li għandhom l-irwol ta’ missier. Hija ġurnata speċjali anke għal dawk li, għal xi raġunijiet, huma mċaħħdin minn uliedhom, jew saħansitra ta’ dawk li jixtiequ li jkunu missirijiet.
Iltqajna ma’ Neil Attard, li bħal kull min tilef lil missieru, ukoll iħoss in-nuqqas kbir ta’ missieru Raymond, li llum m’għadux magħna. Raymond Attard kien serva għal tliet leġiżlaturi bħala Viċi Sindku tax-Xgħajra. Għal 44 sena wkoll serva b’ħidma ħawtiela mal-linja nazzjonali tal-ajru Maltija b’tant ħila.
L-eżempju jkaxkar, tant li fil-2013, ibnu Neil tħajjar li joħroġ bħala kandidat Laburista għall-Kunsill tal-istess lokalità biex ikompli miexi fuq il-passi ta’ missieru.
Ta’ 29 sena kien inħatar bħala Viċi Sindku u fil-ħames snin li għaddew serva bħala Sindku tax-Xgħajra.
Issa l-verdett tax-Xgħajrin fit-8 ta’ Ġunju li għadda reġa’ eleġġih bħala s-Sindku għat-tieni leġiżlatura nfila u bid-doppju tal-voti.
Imma x’kien ifisser missieru għal Neil.
“Ifisser ħafna, kollox. Fil-fatt meta ħareġ r-riżultat tal-elezzjoni, ħassejtni litteralment emozzjonat. Fil-bidu, meta ħriġt għall-ewwel darba, kien beda jinkwieta. Kien qalli isma’ minni. Beda jibża’ li ma mmurx tajjeb u tlajt Viċi Sindku u kien veru kuntent. Imbagħad komplejt ħdimt u t-tieni darba, meta tlajt Sindku, kienet l-isbaħ tbissima li rajt fuq wiċċu … qatt ma rajtha qabel. Kien veru kuntent għalija. Meta kont żgħir tajtu xi ftit inkwiet.”
Minkejja kollox, Neil u missieru kienu qrib ħafna.
“Dak iż-żmien tal-elezzjoni ġenerali konna attivi kemm jien u d-daddy, konna ngħinu ħafna fil-kampanja, konna qed nistennew l-elezzjoni. Missieri minn dejjem kien attiv. Dakinhar kellna attività, xi jumejn qabel, u kellna group chat fuq il-WhatsApp u d-daddy kien qed iħossu b’kemmxejn żgħira ħruq. Fil-fatt kien mar għand it-tabib, qallu li kellu xi dardir u tah xi pillolli. Ġurnata qabel bagħat messaġġ fil-grupp u kien qalilhom li l-għada narakom ħdejn l-iskola fil-post tal-votazzjoni.”
Imma missier Neil, dan l-appuntament ma żammu qatt. Is-Sibt tal-elezzjoni ġenerali, nhar is-26 ta’ Marzu 2022, Neil irċieva aħbar li qatt ma stenna.
“Xit-8.30 irċevejt call u rajt mummy u kif qbadtu nisma’ t-twerżiq, x’biċċa ġratilna, miet missierek. Dak il-ħin ixxokjajt, rajt dalma quddiemi. Inżilt Marsaskala, tlajt it-taraġ niġri u nsib lil missieri mal-art, f’din il-pożizzjoni, bħal rieqed, u l-mama qed tagħtih is-CPR. Wara żewġ minuti ġew tal-Emerġenza, qabddulu n-nifs artifiċjali. Ipprovaw minn kollox, iżda sfortunatament kien miet id-daddy.”
Minn fomm l-imġarrab stajna nindunaw li, għalkemm issa għaddew ’il fuq minn sentejn, Neil għadu jħoss ħafna n-nuqqas u t-telfa li ġarrab, ta’ missieru Raymond, f’qasir il-għomor ta’ 64 sena.
Ħalliet effett enormi fuqu. Qasam magħna l-emozzjonijiet li ħass, hekk kif ħareġ ir-riżultat tal-Kunsill tax-Xgħajra din il-ġimgħa.
“Għalkemm m’għadux magħna u qabel ma ħalliena ma kontx għedtlu ċaw, inħoss li hu għadu ħdejja, dejjem miegħi, f’kull pass li nagħmel, speċjalment meta kont il-counting hall, litteralment qed nara l-ballot papers, nittikkja l-voti tiegħi u qed inħoss li hemm hu ħdejja, qed jarani. U wara ftit samples indunajt li kont se nirbaħ b’ammont ta’ voti, ħadt gost u ħassejt lid-daddy qed jitbissimli u qiegħed ħdejja u qed jitbissem.”
