Il-Kunsilliera tal-Kunsill Lokali ta’ San Ġiljan u r-rappreżentati tal-hamlet ta’ Paceville eletti f’isem il-Partit Laburista, iddisassoċjaw ruħhom bl-iktar mod kategoriku mill-mod kif Kunsilliera Nazzjonalisti tal-istess Kunsill organizzaw laqgħa f’isem il-Kunsill Lokali nhar il-Hamis li għadda fil-Millenium Chapel.
Il-Kunsillieri qalu li jinsabu konvinti li din il-laqgħa ma ġietx organizzata kif suppost minħabba nuqqas ta’ konsultazzjoni u li ġiet organizzata b’talli mod li suppost laqgħa ta’ konsultazzjoni fejn kulħadd seta’ jkun mistieden isemma leħnu fuq il-Masterplan ta’ Paceville, inbidlet f’ laqgħa ta’ Oppożizzjoni fejn ġew mistiedna biss dawk l-għaqdiet li huma kontra dan il-proġett.
Huma spjegaw li meta ġew mgħarrfa bil-mod kif se ssir il-laqgħa, bħala Kunsilliera saħqu għal darba darbtejn li laqgħa ta’ konsultazzjoni ma ssirx b’dak il-mod għax kienet se tinstema’ naħa waħda ta’ din l-issue li seta’ joħloq allarm żejjed fost ir-residenti ta’ San Ġiljan u Paceville.
Il-Kunsilliera Laburisti jilqgħu b’sodisfazzjon il-fatt li hawn Gvern li jrid jara’ titjib f’ din iż-żona tant li ħejja dokument għad-diskussjoni sabiex jiġi mwettaq proġett li mhux biss se jagħti ħajja ġdida lil din z-zona iżda wkoll se jagħti valur miżjud kemm il-wirt naturali u storiku kif ukoll lir-residenti li ilhom is-snin ibatu’ b’ impatt negattiv minn telqa kbira f’ din l-istess zona.
Bl-istess mod il-Kunsilliera Laburisti u l-membri tal-Kumitat Amministrattiv ta’ Paceville, innutaw il-bidliet proposti f’dan id-dokument fejn fost l-oħrajn dan il-proġett se jkun qed iwassal għal titjib fil-pjan dwar kif isir il-bini, joħloq bilanċ bejn żvilupp u zoni pubbliċi miftuħa, bini mill-ġdid ta’ infrastruttura ġdida, tnaqqis fl-emmissjonijiet minn trakkijiet u vetturi, pjanijiet għal bini ta’ spażji ta’ parkeġġi ġodda, mod ġdid ta’ tqassim ta’ merkanzija għaz-zoni ta’ negozju u fuq kollox separazzjoni fiżika bejn zoni ta’ divertiment u oħrajn residenzjali.
Il-Kunsillieri Laburisti ta’ San Ġiljan, appellaw lill-Kunsill Lokali tagħhom sabiex jagħmel laqgħat ta’ konsultazzjoni mar-residenti kollha biex flimkien jagħmlu proposti konkreti u pożittivi sabiex permezz tagħhom, ikun hemm titjib addizzjonali għal dan il-Pjan u mhux jinteresshom biss li jmexxu l-aġenda tal-Partit Nazzjonalista billi jkunu negattivi fuq kull proposta li ssir akkost ta’ kollox.
