Il-Ħamis filgħodu kompliet tinstema’ l-kumpilazzjoni tax-xhieda kontra n-negozjant Yorgen Fenech, is-suspettat mandat fil-qtil ta’ Daphne Caruana Galizia.
Quddiem il-Maġistrat Rachel Montebello, il-prosekuzzjoni mmexxija mill-ispettur Keith Arnaud u l-ispettur Kurt Zahra, komplew iressqu aktar evidenza.
Xehed l-espert Alvin Cardona li ppreżenta kopja tal-informazzjoni diġitali, ritratti u recordings li kienu għand il-middleman Melvin Theuma, li ngħata l-maħfra presidenzjali wara li ta evidenza lill-investigaturi f’dan il-każ u każijiet oħra.
Is-seduta kellha tiġi sospiża għal xi ħin sabiex jiġi rranġat apparat teknoloġiku biex jinstemgħu r-recordings bejn Theuma u Fenech.
Is-seduta kompliet ftit tal-ħin wara, bl-ewwel xhud fuq il-pedana tax-xhieda kien Melvin Theuma, li ġie mistoqsi mill-ispettur Arnaud dwar ir-recordings.
Xehed li Yorgen Fenech ma kienx jaf li qed jirrekordjah u kien f’Ottubru tal-2018 li qallu li qiegħed jirrekkordjah għax beda jibża’ għal ħajtu.
Fis-seduta instema’ recording wieħed biss bejn Theuma u Fenech, li jmur lura għall-elfejn u tmintax. Dakinhar mar għal Yorgen Fenech u wlieda l-ajruport.
Il-konversazzjoni saret fil-karozza Jaguar li bdiet tinstaq minn Theuma.
Għal bidu Fenech beda jkellmu fuq il-football, iżda Theuma mill-ewwel beda jkellmu fuq il-pledge li kellhom jingħataw l-aħwa Alfred u George Degiorgio u Vince Muscat, l-eżekuturi tad-delitt.
Fir-recording Theuma semma’ lil Kenneth Camilleri u qallu li fit-tnejn u għoxrin tax-xahar kellhom jingħataw il-ħelsien mill-arrest u miljun kull wieħed. Qal li f’moħħu daħħal li wara dan kollu kien hemm Keith Schembri, minkejja li ma setax jgħid bil-ġurament li kien involut.
Fir-recording instemgħet il-kelma tradiment għax beda jibża’ li Fenech se joqtlu jew se jitfgħu l-ħabs.
Jissemma’ wkoll l-avukat Arthur Azzopardi li kien qed jidher għall-Koħħu. Qal li beda jibża’ li sejjer id-Depot u jikxef kollox.
Fir-recording Theuma jinstema’ jgħid li se jaqbad lil ħu l-Fulu u jtellgħu l-Mellieħa. Fix-xhieda speċifika li kien qed jirreferi għal wara l-bieb ta’ Keith Schembri għax kien ċert li kollox kien ġej minnu.
Fir-recording Fenech jinstema’ jgħid li ma jistax jerfa r-responsabilita għax ma kien jaf b’xejn. Qal li Schembri ma setax jirranġa l-pledge għax lanqas affarijiet tiegħu l-qorti ma irnexxielu jirranġa.
Minħabba li r-recordings ma kinux ċari, il-Maġistrat ħatret espert biex jagħmel traskrizzjonijiet tagħhom.
Preżenti fl-awla kien hemm Marlene Fenech, mart l-akkużat, kuġinuh u xi ħbieb. F’ħinijiet minnhom il-qraba ta’ Caruana Galizia dehru joġġezzjonaw għall-preżenza tagħhom u ma riedux jersqulhom.
