L-Isptar Ġenerali t’Għawdex se jagħmel pass importanti ‘l quddiem fil-qasam kardijaku għall-pazjenti Maltin u Għawdxin bl-introduzzjoni tas-servizzi ġodda ta’ Cardiac CT u Cardiac MRI. Dan tħabbar mill-Ministru għas-Saħħa u l-Anzjanità Attiva Jo Etienne Abela fi żjara li għamel f’dan l-isptar.
Il-Ministru Abela, qal kif wara l-akkwist riċenti ta’ żewġ scanners bl-aħħar teknoloġija tal-MRI u CT Scan, l-Isptar Ġenerali t’Għawdex issa jista’ joffri testijiet tal-qalb dettaljati li jippermettu djanjosi aktar bikrija u preċiża.
Huwa spjega kif l-introduzzjoni tal-Cardiac CT tippermetti detezzjoni rapida ta’ mard tal-arterji tal-qalb f’pazjenti b’riskju baxx u intermedju. Dan filwaqt li l-introduzzjoni tal-Cardiac MRI toffri eżamijiet fil-fond tal-funzjoni tal-qalb.
Intqal kif grazzi għall-kollaborazzjoni tad-Dipartiment tal-Medical Imaging f’Malta u Għawdex, u tad-Dipartiment tal-Kardjoloġija, dan is-servizz ser jippermetti djanjosi effiċjenti u trattament avvanzat tal-mard tal-qalb, filwaqt li jenfasizza wkoll l-impenn tal-gvern li jiżviluppa s-servizzi tas-saħħa u jtejjeb ir-riżultati għall-pazjenti.
Il-Ministru elenka wkoll kif dan l-investiment fl-Isptar Ġenerali t’Għawdex se jgħin l-Isptar ta’ Malta.
“Waiting lists għall-pazjenti Għawdxin tista’ tgħid ma teżistix, mhux talli hekk, talli l-Isptar Ġenerali t’Għawdex qed jgħin lill-Isptar ta’ Mater Dei biex jitnaqqsu l-waiting lists hemmhekk ukoll.”
Il-Ministru Jo Etienne Abela
