Jibdew jinġabru n-nies għall-funeral tal-President tal-Iran

Ġemgħat kbar ta’ nies bdew jinġabru fil-kapitali Iranjana, Tehran, għaċ-ċerimonja tal-funeral tal-President tal-pajjiż, Ebrahim Raisi.

Raisi miet, flimkien mal-Ministru għall-Affarijiet Barranin u sitt persuni oħra, li kienu f’ħelikopter li ġġarraf il-Ħadd, mal-fruntiera mal-Ażerbajġan.

Iċ-ċerimonja se tibda b’talb fil-kapitali, imbagħad it-twiebet li se jġorru l-bandiera Iranjana, se jittieħdu fil-pjazza ewlenija ta’ Azadi.

L-awtoritajiet wissew kontra dimostrazzjonijiet dwar il-purċissjoni tal-funeral u dwar insulti li saru online.

Madwar il-belt kapitali, tpoġġew kartelluni kbar ifaħħru lil Raisi bħala l-‘martri tas-servizz’ u ‘l-qaddej tal-iżvantaġġjati’.

Fil-pajjiż ġew iddikjarati ħamest ijiem ta’ luttu nazzjonali.