Minn dan ix-xahar eluf ta’ pensjonanti u benefiċjarji soċjali bdew, jew ser jibdew igawdu miż-żidet u titjib mħabbra fil-budget għal din is-sena.
B’mod partikolari dawn il-miżuri jinkludu ż-żieda ta’ €7 fil-ġimgħa fil-pensjonijiet.
Dan intqal waqt konferenza tal-aħbarijiet mill-Ministru għall-Familja u Solidarjetà Soċjali Michael Falzon hekk kif ġie spjegat li diġà bdew jingħataw l-ewwel żidiet fil-pensjoni tal-età mhux kontributorja.
Għal dawk miżżewġin r-rata telgħet għal kważi €158 fil-ġimgħa u għal dawk li jgħixu waħedhom ir-rata laħqet il-ftit aktar minn €125 fil-ġimgħa.
Imqabbla mar-rati fis-seħħ fl-2013, ir-rati l-ġodda żdiedu bi kważi 24%.
Il-Ministru Falzon qal li diġà tħallsu wkoll iż-żidiet fl-allowance tal-carers u l-persuni b’diżabilità severa li għall-ebda raġuni ma jistgħu jidħlu fid-dinja tax-xogħol bdew jirċievu l-ekwivalenti tal-paga minima.
Fil-fatt 650 benefiċċjarju qed igawdu minn din l-assistenza ta’ kważi €8,400 €8,393 fis-sena.
Iż-żieda mħabbra fil-budget fl-ammont ta’ għajnuna supplimentari li jirċievu anzjani ta’ ‘l fuq minn 65 sena li jinsabu f’riskju ta’ faqar ukoll diġa bdiet titħallas. Dan sar fil-pagament li rċevew l-anzjani qabel il-Milied, liema pagament kien ikopri l-ewwel tlett xhur tas-sena bil-quddiem.
Intant din il-ġimgħa ser jibdew jibbenefikaw dawk li qegħdin fuq l-Għajnuna Soċjali kif ukoll il-pensjonanti tal-irtirar li huma ntitolati għall-pensjoni taż-żewġ terzi.
Dan flimkien ma’ dawk li huma pensjonanti tas-servizz hekk kif kollha ser jirċievu ż-żieda ta’ €7 fil-ġimgħa fil-pensjoni tagħhom, li tinkludi ż-żieda għall-għoli tal-ħajja.
Biex b’hekk din tkun l-akbar żieda li qatt ingħataw il-pensjonanti fl-aħħar 40 sena.
Il-pensjonanti romol ukoll se jirċievu ż-żieda ta’ €7 fil-ġimgħa fil-pensjoni tagħhom nhar is-Sibt li ġej. Fl-istess ġurnata se jirċievu żieda ukoll dawk li qegħdin fuq l-għajnuna medika.
Imbagħad is-Sibt 25 ta’ Jannar ikun imiss lil pensjonanti tal-invalidita’ u l-pensjonanti fuq il-pensjoni minima li huma wkoll se jkunu qed jirċievu ż-żieda ta’ €7 fil-ġimgħa fil-pensjoni tagħhom.
Il-Ministru Michael Falzon saħaq li dawn il-miżuri soċjali, uħud ġodda u oħrajn li jsaħħu fuq dak li kien introdott qabel juru l-impenn soċjali ta’ dan il-Gvern.
Dr Falzon stqarr: “Ta’ min jinnota li għal budget wara l-ieħor dan il-Gvern wera mpenn soċjali qawwi ħafna. Dan il-baġit jipprovdi għal tisħiħ ta’ miżuri li diġà kien hemm, benefiċċji li kien hemm u wkoll qed nintroduċu oħrajn ġodda.”
Quddiem dan kollu spjega li l-Gvern jibqa’ impenjat li jindirizza r-realtajiet soċjali differenti taċ-ċittadini Maltin u Għawdxin.
Il-Ministru Falzon temm jgħid: “Riżultati pożittivi li jagħmlulna kuraġġ. Riżultati pożittivi imma umbgħad iktar importanti li jixprunawna nagħmlu aktar.”
