Mas-sena l-ġdida l-pensjonanti Maltin se jerġgħu jaraw il-ħames żieda konsekuttiva fil-pensjoni. Din il-miżura mħabbra fil-budget se tara l-pensjonijiet jiżdiedu b’€7 fil-ġimgħa. Dan filwaqt li għall-ewwel darba persuni b’diżabilità severa se jingħataw l-ekwivalenti tal-paga minima.
Iż-żieda fil-pensjoni fil-ġimgħa se tkun ta’ €3.51 filwaqt li se tidħol fis-seħħ żieda oħra tal-għoli tal-ħajja ta’ €3.49 ċenteżmu fil-ġimgħa.
B’hekk fil-11 ta’ Jannar l-pensjonanti tal-irtirar se jirċievu l-pensjoni taż-żewġ terzi u dawk li huma pensjonanti tas-servizz li se jirċievu ż-żieda ta’ €7 fil-ġimgħa fil-pensjoni tagħhom.
Fl-istess ġurnata jirċievu żieda wkoll dawk li qegħdin fuq l-għajnuna soċjali. Se jirċievu ż-żieda addizzjonali wkoll dawk li kienu jaħdmu fis-settur pubbliku u li rtiraw bejn l-2016 u l-2018 ta’ 62 sena jew aktar, b’aktar minn 35 sena bolol.
Minbarra dan il-pensjonanti se jingħataw tnaqqis mit-taxxa fuq id-dħul mill-pensjoni ta’ kważi €13,800 fl-2020. Fil-każ ta’ koppji miżżewġin se jiżdied għall-elfejn oħra, jiġifieri ma jħallsux taxxa fuq l-ewwel €15,800.
Dan filwaqt li fis-sena l-ġdida l-Gvern se jerġa’ jagħti €300 lil 30,000 anzjan li għalqu 75 sena li għadhom jgħixu f’darhom u għall-ewwel darba dawk li laħqu 80 sena se jaraw żieda ta’ €50 oħra.
Żidiet ukoll għall-pensjonanti romol u dawk li qegħdin fuq l-għajnuna medika, li fit-18 ta’ Jannar jieħdu ż-żieda huma wkoll. Fil-25 ta’ Jannar ikun imiss imbgħad lill-pensjonanti tal-invalidità u l-pensjonanti fuq il-pensjoni minima.
Jannar tal-2020 se jimmarka wkoll id-dħul fis-seħħ ta’ miżura li ser tkun qed tgħin lil persuni b’diżabilità severa u li assolutament ma jistgħux jaħdmu.
Dan hekk kif dawn se jkunu se jibdew jirċievu l-ekwivalenti tal-paga minima nazzjonali. B’hekk se jkunu qed jirċievu ftit iktar minn €160 fil-ġimgħa bħala parti mill-pensjoni tad-diżabilità. Din il-miżura se tara 650 persuna jingħataw żieda ta’ €11 fil-ġimgħa minn dak li qed jingħataw bħalissa.
Din iż-żieda hija l-ewwel waħda li se tidħol fis-seħħ fl-4 ta’ Jannar se titħallas flimkien maż-żieda fil-Pensjoni tal-Età mhux Kontributorja u iż-żidiet fl-Allowance tal-Carers.
Mas-sena l-ġdida dawk li jagħmlu użu minn apparat speċjali minħabba d-diżabilità tagħhom se jkunu qed jaraw iż-żieda ta’ €400 mal-għotja li tkopri parti sostanzjali tal-VAT li jkun tħallas fuq l-apparat. Biex b’hekk il-massimu tal-għotja se jitla’ għal €1,000.
Fi stqarrija il-Ministru Michael Falzon stqarr li fost il-miżuri li se jiġu implimentati dalwaqt hemm dawk li jikkonċernaw il-bonus ġdid ta’ €300 li se jibda jitħallas lill-ġenituri li jkollhom trabi ġodda, żidiet għar-romol li għandhom it-tfal taħt it-18-il sena, żidiet għall-anzjani li għandhom 80 sena jew aktar fl-għotja li jirċievu kull sena, żidiet għall-anzjani li jgħixu fi djar privati tal-anzjani, u żidiet għal dawk ta’ ’l fuq minn 75 sena li issa se jibqgħu jew jibdew jirċievu l-bonus annwali li jitħallas lil dawk li kienu ħallsu xi bolol imma m’għandhomx pensjoni.
