Investiment ġdid ta’ €700,000 mill-Gvern qed jiffinanzja l-ħidma tad-Dipartiment tar-Restawr u l-Presevazzjoni fl-ewwel fażi ta’ restawr fuq il-Bastjun ta’ San Pawl, li jifforma parti mill-fortifikazzjonijiet tal-Kottonera.
Dan tħabbar waqt konferenza tal-aħbarijiet, li ġiet indirizzata mill-Ministeru għall-Wirt Nazzjonali, l-Arti u l-Gvern Lokali Owen Bonnici flimkien mas-Segretarju Parlamentari għall-Gvern Lokali Alison Zerafa Civelli.
Hawn tkellem il-Perit Stephen Serracino Inglott, li hu responsabbli minn dan il-proġett.
Qal, “Bħalissa qed isir il-bdil tal-ġebel li kien ddeterjorat ħafna li jista’ jikkawża problemi strutturali, allura qed isir b’ġebel ġdid bil-forma oriġinali tas-swar.”
Il-Ministru Bonnici esprima s-sodisfazzjon tiegħu għal dan l-investiment ieħor biex jibqa’ jiġi ppriservat is-sit importanti, fost diversi proġetti oħrajn simili mid-Dipartiment tar-Restawr u l-Presevazzjoni biex ikompli jitħares il-wirt storiku nazzjonali.
Qal, “Issa bdejna nagħmlu r-restawr fil-Bastjun ta’ San Pawl. Dan hu proġett li se jkun maqsum fi tnejn. L-ewwel fażi mistennija li titlesta bħal dan iż-żmien sena u din hi l-ewwel darba fl-istorja ta’ pajjiżna li dawn is-swar qed jiġu rrestawrati. Aħna rridu nirrestawraw is-swar kollha tal-Kottonera.”
Restawr ieħor simili fil-Kottonera, dak fuq il-Bieb ta’ Santa Liena u s-swar maġenbu fid-daħla ta’ Bormla, għadhom kemm ġew inawgurati fl-aħħar jiem.
Min-naħa tagħha, is-Segretarju Parlamentari Zerafa Civelli apprezzat il-ħidma impekkabbli tad-Dipartiment fuq siti patrimonjali f’pajjiżna.
Qal, “Ġejna nżuru aktar xogħlijiet ta’ restawr, grazzi għad-Dipartiment tar-Restawr u l-Preservazzjoni, biex naraw din il-kullana ta’ xogħlijiet differenti u llum, iva, qegħdin inżuru x-xogħol ta’ restawr fuq is-Sur ta’ San Pawl.”
Ir-restawr jinkludi tindif tas-sur, bdil tal-ġebel biex ma jinħolqux problemi strutturali waqt li l-istruttura unika tissaħħaħ iżjed.
Is-Sindku ta’ Bormla, Marco Agius, irringrazzja lill-Gvern u lid-Dipartiment tar-Restawr u l-Preservazzjoni għal dan ix-xogħol impekkabbli li qed isir fis-swar li jdawru t-Tlett Ibliet.
Is-swar tal-Kottonera kienu protagonisti fi żmien l-imblokk tal-Franċiżi bejn is-snin 1798 u 1800, wara li dawn ingħalqu hemm, flimkien mal-Belt Valletta u l-Furjana.
Bħal oħrajn, dawn għadhom evidenti fuqhom numru sostanzjali ta’ ħsarat mill-balal tal-kanuni, li kienu sparati mill-Maltin dak iż-żmien.
Minbarra hekk, aktar ’il quddiem waqt it-Tieni Gwerra Dinjija, is-swar servew fil-protezzjoni taż-żona, fejn reġgħu saru ħsarat estensivi mill-bombi tal-Assi.
