Raġel ta’ 44 sena minn Ħal Tarxien beda għaddej ġuri dwar allegat stupru fuq martu fl-2019. Ir-raġel, li ismu ma jistax jixxandar fuq ordni tal-Qorti, jinsab akkużat ukoll li ffastidjaha u li kellu fil-pussess tiegħu d-droga kokaina.
Il-koppja kien ilhom miżżewġin għal aktar minn għaxar snin, iżda kienu għaddejjin minn proċeduri ta’ separazzjoni.
F’Mejju tal-2019, ir-raġel mar lura d-dar għall-ħabta tal-4:00 ta’ filgħodu wara li qatta’ lejl barra fil-każin tal-banda. Filwaqt li l-mara qamet malli semgħetu, hu ried ikollu relazzjoni sesswali magħha, li rrifjutat fid-dawl tal-proċeduri ta’ separazzjoni.
Minkejja dan, u waqt li l-mara rreżistietu, ir-raġel allegatament stupraha.
Aktar tard il-Pulizija ġiet informata li mara kienet iddaħħlet l-Isptar Mater Dei fejn sostniet li kienet ġiet stuprata minn żewġha.
L-Imħallef Consuelo Scerri Herrera qed tippresiedi l-ġuri.
L-Avukat Darleen Grima qed tmexxi l-prosekuzzjoni f’isem l-Uffiċċju tal-Avukat Ġenerali, waqt li għall-akkużat qed jidhru l-Avukati Simon Micallef Stafrace u Julia Micallef Stafrace.
