Il-Ġimgħa bdiet it-tnax-il edizzjoni tal-Festival tal-Arti għat-Tfal u ż-Żgħażagħ, ŻiguŻajg, li se jibqa’ għaddej sas-27 ta’ Novembru. Matul l-għaxart ijiem ta dan il-festival, se jsiru produzzjonijiet li jinvolvu t-teatru, iż-żfin, kif ukoll l-arti viżiva u l- musicals, li se jfisser varjetà ta’ forom ta’ arti li jolqtu l-gosti ta’ kulħadd.
Dan il-festival se jerġa’ jkun qed isir fi Spazju Kreattiv, wara li fl-aħħar sentejn sar b’mod virtwali minħabba l-pandemija
Waqt il-ftuħ ta’ dan il-festival, il-patruna ta’ ŻiguŻajg, Dr Lydia Abela, qalet li l-arti għandu jkollha rwol kruċjali fl-iżvilupp personali tat-tfal u fl-edukazzjoni tagħhom. Hija nnutat li, permezz ta’ ŻiguŻajg, it-tfal qed ikollhom aċċess għall-arti.
“Nibagħtu messaġġ ċar li, anke fis-settur tal-arti u l-kultura, hemmhekk qed nagħtu ċ-ċans lil kulħadd. Se jkun hemm ukoll performances sensory-friendly biex ukoll nagħtu opportunità lit-tfal b’abbiltajiet differenti jiġu hawnhekk u jsegwu dan il-festival, għaliex nemmnu li t-tfal irridu nressquhom lejn l-arti u l-kultura u nassiguraw ruħna illi l-arti u l-kultura jkunu parti mill-iżvilupp tat-tfal tagħna.”
Il-Ministru responsabbli mill-Arti, Owen Bonnici, enfassiza l-importanza li għandu l-festival ŻiguŻajg, li jħalli impatt fuq studenti żgħar li jġorru l-esperjenzi u t-tagħlim li jibqgħulhom bħala gwida tul il-ħajja ta’ kuljum tagħhom.
“Bħalissa qed ngħixu f’dinja fejn hija mibnija fuq il-bżonn li nkunu kreattivi. Aktar ma nkunu kreattivi, aktar nagħmlu suċċess f’ħajjitna, u għalhekk il-kultura hija kruċjali għaliex titfa’ ż-żerriegħa tal-kreattività fil-qlub u fl-imħuħ tat-tfal tagħna sa minn età żgħira. It-tfal tagħna huwa importanti ħafna għalihom li jkunu esposti għall-kultura, mhux biss għax tagħmilhom kuntenti imma għaliex hija ċ-ċavetta tas-suċċess professjonali meta jikbru.”
Iċ-Chairman ta’ Fondazzjoni Kreattività, Rupert Cefai, qal li wħud mit-tfal li llum qegħdin fl-udjenza, jistgħu jkunu l-artisti futuri tagħna.
Min-naħa tagħha, id-Direttur tal-Festival ŻiguŻajg, Marta Vella, esprimiet il-kburija tagħha b’dak li ŻiguŻajg irnexxielu jikseb din is-sena.
Intant, is-sejħa għall-proposti għas-sena d-dieħla hi miftuħa. L-ideat dwar il-festival jistgħu jintbagħtu fuq www.ziguzajg.org.
