- DCG TGĦID LI JEKK HEMM BŻONN JINTILFU L-IMPJIEGI
- L-MEPs TAL-PN MA JLISSNUX KELMA
L-iskop ewlieni taż-żjara tal-kumitat PANA f’pajjiżna iktar kmieni din il-ġimgħa kien li jiskrutinizzaw is-sistema ta’ tassazzjoni f’pajjiżna u l-inċentivi li jattiraw lejn Malta kumpaniji differenti minn madwar id-dinja. U pajjiżna ma tantx kien megħjun minn dawk li suppost jirrappreżentawh fil-Parlament Ewropew.
Malta ilha snin taħt pressjoni minħabba l-pożizzjoni vantaġġjuża tagħha u din iż-żjara ttieħdet bħala okkażjoni unika għal membri parlamentari Ewropej bħal Sven Giegold, tal-Partit tal-Ħodor, li s-sistema Maltija ilha fil-mira tiegħu. Giegol ma kienx waħdu. Membri parlamentari minn pajjiżi oħra fetħu attakk li jista’ jipperikola eluf ta’ impjiegi fis-settur finanzjarju ta’ pajjiżna u jrewħulhom sabu lil Ivan Camilleri, tat-Times of Malta u l-google group ta’ Tonio Fenech, u Daphne Caruana Galizia, li f’laqgħa mal-kumitat tkellmu kemm felħu kontra s-sistema Maltija.
Anke jekk is-sistema Maltija hija approvata minn istituzzjonijiet internazzjonali fosthom il-Kummissjoni Ewropea u l-OECD, l-organizzazzjoni internazzjonali li għandha x’taqsam ma’ kwistjonijiet ta’ governanza.
“Jiena totalment kontra s-sistema li toffri kumpaniji fiduċjarji u kumpaniji nominee. Malta għandha tneħħi din is-sistema minkejja l-impjiegi li toffri u l-impatt fuq l-ekonomija,” qalet Caruana Galizia lill-kumitat PANA. Din id-dikjarazzjoni tfisser theddida fuq eluf ta’ impjiegi professjonali f’Malta u l-għajxien ta’ eluf ta’ familji.
Caruana Galizia qalet dan wara dikjarazzjonijiet mhux ippruvati dwar korruzzjoni u biżibilju allegazzjonijiet oħra. Quddiem dan l-attakk fil-preżenza ta’ MEPs barranin li lil Malta jarawha kompetitur, il-Membri tal-Parlament Ewropew Roberta Metsola, David Casa u Therese Commodini Cachia m’għamlu xejn għajr tbissmu. Ma lissnux kelma waħda favur settur li beda fi żmien il-Gvern ta’ Eddie Fenech Adami u li għal deċenji ra l-forzi kollha politiċi jiġbdu ħabel wieħed biex jisseddaq u jikber.
Din l-attitudni David Casa ħadha f’laqgħat oħra u mhux biss dik mal-ġurnalisti; anke f’laqgħat mal-esperti finanzjarji Casa kien partiġjan fejn, meta r-rappreżentanti ta’ Malta kienu qed jiddefendu dak li għandna, hu kien jinteressah li jkun biss partiġjan u jitkellem biss dwar Keith Schembri u Konrad Mizzi.
L-akkuża regolari kontra Malta hi li pajjiżna huwa tax haven. Iżda Malta hija ġurisdizzjoni onshore u ilha hekk mill-2003. Kollox jindika li ma tistax tissejjaħ ġurisdizzjoni offshore għax dawn ir-riskji tneħħew qabel pajjiżna ssieħeb fl-Unjoni Ewropea.
Malta m’għandha ebda segretezza fejn jidħlu kontijiet bankarji u f’Diċembru 2013 saret firmatarja ta’ ftehim li ġab flimkien 37 pajjiż.
Jekk ikun hemm il-ħtieġa, Malta tgħaddi tagħrif dwar il-barranin li jgħixu hawn lill-pajjiż li jkunu ġejjin minnu. Tax haven hija marbuta mas-segretazza u liġijiet dgħajfa. Malta mhix il-każ.
Tant li kienet proprju Malta li din il-ġimgħa waslet għal ftehim fuq livell Ewropew dwar evażjoni ta’ taxxa. Dan waqt il-Kunsill għall-Affarijiet Finanzjarji u Ekonomiċi fi Brussell, l-Ecofin, u l-ftehim huwa teknikament magħruf bħala l-Anti-Tax Avoidance, ATAD II.
Dan hu maħsub biex jipprevieni l-evażjoni tat-taxxa u l-ħasil ta’ flus minn kumpaniji internazzjonali, u se jsir billi tinġabar lista ta’ pajjiżi terzi li ma jikkoperawx mal-liġijiet Ewropej dwar it-taxxa bil-għan li dawn ikunu esklużi minn negozju mal-pajjiżi tal-Unjoni Ewropea.
Waqt li kien Brussell, il-Ministru tal-Finanzi Malti Edward Scicluna tkellem ma’ Wolfgang Schauble, Ministru tal-Finanzi Ġermaniż, li min- naħa tiegħu mhux biss serraħ ras il-Ministru Malti li jifhem sew il-pożizzjoni Maltija, iżda tah il-kelma wkoll li se jorganizzalu laqgħat ma’ ġurnalisti Ġermaniżi f’Berlin biex ikun jista’ jitla’ ma’ esperti Maltin u jfisser x’qed nagħmlu Malta u kif dan kollu huwa skont ir-regoli Ewropej.
Settur li tant huwa importanti li fil-Country Report tal-Kummissjoni Ewropea ppubblikat iktar kmieni din il-ġimgħa jingħad li s-servizzi finanzjarji huma fost l-iktar setturi kruċjali tal-ekonomija Maltija. Dawn jgħoddu għal 6.7% tal-valur miżjud, iktar mill-medja fiż-Żona Ewro ta’ 4.9%. Is-settur finanzjarju kien jammonta għal 5.2% tal-impjiegi fis-sena 2015 – id-doppju taż-Żona Ewro.
