L-establishment Nazzjonalista kompla bl-attakki tiegħu fil-konfront tas-Supretendent tas-Saħħa Pubblika, il-Professur Charmaine Gauci, ftit wara li ħadet l-ewwel doża tal-vaċċin għall-Covid-19.
L-eks Kap tal-Partit Nazzjonalista Simon Busuttil, qal li mn’alla kienet is-sieħba tiegħu Kristina Chetcuti li kitbet fuq Charmaine Gauci.
Bil-kliem “The power of the pen”, Simon Busuttil ta x’jifhem li Kristina Chetcuti wasslet biex lil Charmaine Gauci ġabitha f’postha u ħadet it-tilqima.
Fuq il-midja soċjali kiteb ukoll Wayne Hewitt, esponent ieħor tal-fazzjoni ta’ Simon Busuttil li jinsab wara Bernard Grech.
Hewitt, li għajjar lil ta’ Delia bħala erbat iqtates, attakka lil dan l-istazzjon u rrimarka wkoll li l-Professur Charmaine Gauci obdiet lil Kristina Chetcuti ta’ Simon Busuttil.
Qal li missna nirringrazzjaw lil Kristina Chetcuti talli s-Supretendent tas-Saħħa Pubblika ħadet il-vaċċin.
Intant anki l-Kap tal-Oppożizzjoni ddefenda lil Chetcuti quddiem l-attakk tal-esponenti ewlenin tal-Partit Nazzjonalista fuq Charmaine Gauci.
Wara li Kristina Chetcuti qalet li l-Professur Gauci missha tmur tixrob ix-xampanja u tħalli l-proċess tat-tilqim f’idejn ħaddieħor, Bernard Grech attakka lis-Supretendent tas-Saħħa Pubblika.
Fuq is-suġġeriment insolenti li Charmaine Gauci tintefa’ tixrob ix-xampanja, qabel ukoll id-deputat ta’ Bernard Grech Jason Azzopardi.
Bernard Grech kompla b’lingwaġġ li jitfa’ dubji serji dwar il-vaċċin innifsu kif propju kitbet Kristina Chetcuti.
Intant fl-isfond li l-Professur Charmaine Gauci ħadet l-ewwel doża tal-vaċċin, il-Prim Ministru Robert Abela nnota kif waqt pandemija, l-Oppożizzjoni moħħha f’attakk fuq is-Supretendent tas-Saħħa Pubblika u li tifraħ għax obdietha.
Qal, “Ikkummenta l-eks Kap tal-Oppożizzjoni issa did-darba u ftaħar li ġabha f’postha lis-Supretendent tas-Saħħa Pubblika. Tafu għaliex? Għax ħadet il-vaċċin. Issa jiena lil Simon Busuttil nifhmu li qatt ma kellu rebħiet f’ħajtu, u għalih kienet rebħa li bil-kummenti li għamlu ftit tal-jiem qabel, irnexxielhom iġibu lis-Supretendent tas-Saħħa Pubblika f’postha.”
